Thaw ka KHADC da ka Delimitation Committee ba kwah ki shnong ban leit sha kawei pat ka constituency

Shillong, Risaw 26 : Ka Khasi Hills Autonomous District Council (KHADC) ka la thaw da ka Delimitation Committee na ka bynta ban bishar bniah halor ka jingkyrpad kiba bun ki shnong ban kynthup noh ïa ki sha kawei pat ka constituency kaba kham jan bad kham suk ïa ki ha ka leit ka wan.
Haba kren bad ki lad pathai khubor, u Deputy Chief Executive Member, Bah PN Syiem u la ïathuh ruh ba katei ka jingkyrpad ka wan na kylleng ki shnong kiba don ha u pud u sam jong ka Council kynthup ïa ka shnong Mawkohmah kaba hap ha Nongstoin hynrei ka wah ban don noh ha Rambrai constituency, nangta Ksehkohlong kaba hap ha Mawthadraishan hynrei kwah leit noh sha Nongstoin bad ruh kum ka Mawpat kaba hap ha Mawlai hynrei ka kwah ban wan noh sha Pynthorumkhrah constituency.
“Ban pynbeit ïa kane, ngi donkam ban thaw ïa ka Delimitation Committee bad kumta donkam ruh ban ïoh ïa ka jingmynjur na u Lat. Kumta ha ka 26tarik Nailur ngi la thoh sha ka tnad District Council Affairs ba kan ai jingbit na u Lat ban thaw ïa ka Delimitation Committee hynrei kaba sngewtynnad ka long ba u Lat ha ka 20tarik Risaw u la ai ka jingmynjur ban thaw ïa katei ka committee,” ong u Bah PN Syiem.
Nalorkata, u la ïathuh ruh ba ka Executive Committee khlem da pynslem ka la thaw ïa katei ka Committee kaban khlieh da u Dr. S Kharsyiemlieh, Retd Judge District Council Court kum u Chairman katba ki dkhot ka Council ki kynthup naduh u Dr. SL Marbaniang MLA barim, Kong R Myrboh, Nonghikai skul ba la shongthait, Dr. DRL Nonglait, Professor na ka Khasi Department NEHU bad Bah M Kharkrang, Retd Secretary ka KHADC.
La ïathuh ba na ka liang ka Council ka la aibor ha ka committee ban shna ïa ki rule na bynta kaei ka kam bad ruh ban buh ha ka rynsan paidbah (public domain) ïa katei ka bill ba dang tyrwa ban ïoh ïa ka jingkynthoh bad ka jingsngew na ki paidbah bad ruh ban pynlong ïa ki public hearing.
Da kaba pynpaw ba kum ka Council ka khlem buh por katno ban pyndep hynrei ki la shu bthah ba dei ban pyrshang ban leh noh kham kloi.
Shwa kane, u Bah Pynshngain u la ïathuh ba katkum ka jinglap jong ki, ka counstituency kaba bun tam ki nongthep vote ha ka elekshon MDC dei ka Mawlai katba ka Laban kadei kaba rit tam bud sa ka Mawkhar – Pynthor. U ong ruh ba kum ka Council ki hap ruh ban peit lang ïa ki constituency khnang ba ka jingdon ki nongthep vote kan long mar ïa biang khlem bun tham ne khyndiat than bad khamtam eh katkum ka jinglong ka jaka bad ka jingsuk ha ka leit ka wan ki paidbah.