Yn khot ïakren ka Sorkar ïa ka HPC halor ka jingpynkynriah ïa kiba sah na Them Ïewmawlong
Shillong, Risaw, 26: U Symbud Myntri Rangbah ka Jylla uba peit ïa ka tnat Home (Police) Bah Prestone Tynsong ha ka sngi Palei u la ïathuh ba ka Sorkar Jylla kan sa khot ïakren ïa ki nongïalam jong ka Harijan Panchayat Committee (HPC) ha u bnai ban sa wan na ka bynta ban ïathir ïatai ha kaba ïadei bad ka jingpynkynriah ïa ki 342 tylli ki longiing na Sweepers’ Colony, Them Ïew Mawlong.
“Ngin sa don sa kawei pat ka jingïalang bad ki (HPC). Hynrei sngewsih ba ka wan noh ka puja bad ngi kyrmen ba ha u bnai ban sa wan ngin sa lah ban khot ïa ki bad ban ïashong pyrkhat kam sa shisien bad ngin sa aiti ïa ka jubab (Affidavit) sha ka Iingbishar, ong u Bah Tynsong ha ka jingïakren bad ki lad pathai khubor.
Ha ka 29 tarik, Nailur, ka sorkar Meghalaya ka la pyntip ba ka Ingbishar Meghalaya High Court ka la mynjur ban pynheh ïa ka jingai jaka sha manla ka longing katkum ba la kyrpad da ki briew kiba sah ha Sweepers’ Colony.
Ha kaba ïadei bad ka jingjot rathai jong ka surok, u Bah Tynsong uba peit ruh ïa ka tnat PWD (Roads) u la ong, “nga la bthah naduh u Commissioner & Secretary, ïa u Secretary bad ïa Chief Engineers jong ka PWD ban pynsdang noh ïa ka kam namarba mynta ka aiom ka la tyrkhong. Ki dei ban sdang noh ïa ka jingmaramot ïa ki surok kham kloi katba lah.:
Ha kaba ïadei bad ka jingshah ñiew jong ka shnong Byrnihat kum ka shnong ba jaboh tam ha ka jylla Meghalaya, u Symbud Myntri Rangbah u la ong ba u la bthah ïa u Chief Secretary ban shimkhia ïa kane ka kam bad u Chief Secretary jong ka Sorkar Assam.
“Ha kaba ïadei bad ka shnong Byrnihat, ka bynta kaba sha kadiang lada leit sha Guwahati ka dang hap sha Meghalaya bad ka bynta kaba sha kamon ka hap sha Assam. Nga ngeit ba phi ïohi bun tylli ki karkhana ha shilynter ka liang kamon katba na ka liang kadiang ngi don tang ki katto katne ki karkhana ïa kiba ka Meghalaya State Pollution Control Board (MSPCB) ka la peitngor bha. Katba kiba hap sha ka liang jong ka Assam, nga la bthah ïa u Chief Secretary ba un ïakren ïa kane ka kam bad u Chief Secretary ka Jylla Assam ban wad ïa ki lad ki lynti kumno ban peitngor namarba ngim lah ban leit tuklar ïa ki karkhana kiba don sha Assam kiba treikam haduh mynta,” u la ong.