Shillong, Risaw, 26: Saw ngut ki dkhot jong ki seng tit bym pat ju ïohsngew mynno mynno ïa kiba la shu seng da ki katto katne ki riewshim kabu ban ïoh kamai spah da kaba shu dawa pisa na ki nongkhaii bad na ki nongdie duna ha Police Bazar bad na Ïewduh ki la shah kem ha ki Pulit jong ka East Khasi Hills District ha ka sngi Palei.
U kyrwoh ba la phah da u Superintendent of Police (City) Bah Vivek Syiem u la ïathuh, ki Pulit ka Special Cell kiba la ïoh jingtip ba ki don ki briew kiba dawa pisa na ki dukan ha Police Bazar bad ha Ïewduh, marmar ki la pynlong ka jingpynap shrip. Ha kane ka jingpynap shrip saw ngut ki briew kiba donkti ban dawa pisa ki la shah kem na Police Bazar katba ki dang aiti ïa ki shithi dawa pisa sha kawei ka dukan.
Ki pulit ki la ujor ejahar ha Sadar Police Station pyrshah ïa ki saw ngut.
Na ka met jong kine ki saw ngut, ki Pulit ki la ïoh ban kurup, lai tylli ki shithi dawa pisa bad lai tylli ki rusit lum pisa jong ka seng Hynñiewtrep People Defense Alliance (HPDA), ar tylli ki Donation Reciept Slip jong ka United Khasi Movement (UKM), ar tylli ki Donation Reciept Slip jong ka Federation of Khasi United People (FKUP), ar tylli ki Donation Reciept Slip jong ka Confederation of Meghalaya People (CMP), kawei ka Counterfoil Reciept Slip jong ka Khun Hynñiewtrep Youth Council (KHYC), ar tylli ki Donation Reciept Slip jong ka Hynñiewtrep Youth Region (HYR), kawei ka Scooty Apprilla kaba don ïa u nombar ML-05 Q 9828 bad Saw tylli ki mobile phone.
“Ka jingtohkit ban lap ksai shuh shuh ïa kiwei ki dukan bad ki nongkhaii kiba la shah dawa pisa ka dang ïaid shakhmat khnang ban register case shuh shuh pyrshah ïa kiba donkti bad ban ïohkem ruh ïa ki briew ne ki kynhun kiba ju im sngi ha ka kam dawa pisa hapoh ka nongbah. Katto katne na kiba donkti (ba la shah kem) ki dei kiba la don dak sniew ha ki kam runar bad kiba la shah kem teng mynshwa,” la ong u Superintendent of Police (City).
Shuh shuh u Superintendent of Police (City) u la kyntu ïa ki paidbah bad ïa ki nongkhaii ba kin ai jingtip mar mar sha ki Pulit khnang ïohkem ïa kiba donkti ban dawa pisa bad ban pynshitom katkum ki kyndon jong ka aiñ.
