Pynksan u VC ka NEHU ba thungkam ïa u bar jylla khlem da khot ïa ka Advertisement

Shillong, Risaw, 26: U Vice Chancellor jong ka skulbah North Eastern Hill University (NEHU) u Prof. PS Shukla u la pynksan ba ka jingthungkam ïa u Rohit Prasad kum u Technical Advisor ha ka ophis treikam jong u Vice Chancellor ka dei ka rai ba la shim da ka Executive Council.
U Prof. Shukla u la pynpaw ïa kane hakhmat ki samla pule jong ka NEHU ha ki kynta ba ka synjuk ki samla pule ka North Eastern Hill University Students Union (NEHUSU) ki la kthong ïa u Prof. PS Shukla shaduh ka Old Guest House hadien ba kim shym la ïohlad ban ïakynduh ïa u hapoh ka kamra treikam ka jong u, ha ka khyllipmat ba ki la leit ban kerkut ïa ka ophis treikam jong u na ka bynta ban ïoh pynpaw ïa ki mat jingdawa ki jong ki.
Ha ka jingïakren bad ki lad pathai khubor, ki nongïalam ka NEHUSU ki la dawa ban wengkam noh mardor ïa u Rohit Prasad ïa uba la shu thungkam hi da u Vice Chancellor ka skulbah NEHU u Prof. PS Shukla hapoh ka ophis treikam ka jong u kum u Technical Advisor khlem da khot ïa ka Advertisement, khlem da pynlong ïa ka interview bad khlem da ïaid katkum ki kyndon treikam jong kane ka skulbah. Nalor kata, la siew tulop ïa u Rohit Prasad T.75 hajar shi bnai, nalor ka jingsiew DA bad ka jingai sa ka Quarter.
Namar ka jingbym ïakynduh ïa u Vice Chancellor ki samla pule ki la phah swait ban wad jingtip shaei u don. Tang shu ïoh jingtip ba u Vice Chancellor u don ha ka jingïalang jong ka North East Philosophy Teachers Meet, 2023 kaba la long ha Seminar Hall, u Kiang Nangbah Guest House (Old Guest House) NEHU, Shillong Campus, ki samla pule ki la rung jubor shapoh ban pynthud ïa ka jingïalang.
Lehse kane kan dei ka sien ka banyngkong eh ba ki samla pule jong kane ka skulbah kin pynthud ïa ka jingïalang hapoh ka Campus ba la ïashim bynta da u Myntri ka tnat Pule Puthi jong ka Sorkar Jylla u Rakkam A. Sangma.
Da ka jingkyrpad jong u Rakkam A. Sangma, ki samla pule ki la ap ïa u Vice Chancellor shabar ka Guest House tad haduh ban da wai ka jingïalang. Katba ki dang ap ïa u Vice Chancellor ban mih na ka jingïalang ki samla pule ki la pyrta da ki sur pynrem ïa u Vice Chancellor bad dawa ruh ban pynurlong ïa ki mat jingdawa.
Ka NEHUSU ka la byrngem ban pynlong biang da ka jingïakhih lada u Vice Chancellor um wengkam mardor ïa u Rohit Prasad hapoh ka 12 baje mynmiet jong ka sngi Thohdieng bad lada um pynurlong ïa ki jingdawa na ka bynta ka bha ka miat jong ki samla pule jong ka NEHU.
Da ka jingpan jubab, u Prof. Shukla u la pyntip hakhmat ki samla pule ba ïa u Rohit Prasad la thungkam Contractual katkum ki Rule bad Regulation jong ka skulbah NEHU bad nalor kata u la ïathuh ba la pyntip ïa kane sha baroh ki nonghikai bad ki nongtrei jong ka NEHU.
“Lada phi kwah ïa ka kopi (thungkam) ngan ai ïa phi,” ong u Prof. Shukla sha ki samla pule bad bynrap, “kane kam dei ka rai ba la shim da u Vice Chancellor shimet, hynrei kane ka dei ka rai ba la shim da ka Executive Council.”
Shuh shuh u la pynksan ruh ba la thung ïa u Rohit Prasad ban shna ïa ka NEHU App na ka bynta ka jingmyntoi jong ki samla pule. U la ïathuh ruh ba u Prasad u don da ka IT Team kaba ïatreilang ruh bad ki samla pule kumno ban shna ïa ka App.
Kane ka kynhun ki samla pule ka la pynpaw ruh ïa ki mat jingdawa hakhmat u Vice Chancellor, ban ai ïa ka bam ka dih kaba bha sha ki samla pule kiba sah Hostel, ban pynbiang ïa u Wifi bad ban pynthikna ruh ba ki samla pule bad kiba sah hapoh ka NEHU Campus kin don hapdeng ka jingshngaiñ.
Ban pyntreikam pura ïa ka School of Technology (SoT) khnang ba ki samla pule kin dup ïoh jingmyntoi na ka jingdon jong ka Library. “Ngi dawa ruh ïa ki bor pynïaid ban pynthymmai ïa ki kor computer ha ki Laboratories khnang ba ki samla pule kin dup lah ban kham pyntbit shuh shuh ïalade ha kaba leh ïa ki jingwad bniah,” la ong u nongïalam ka NEHUSU bad bynrap, “ngi dawa ruh ba ki bor pynïaid ka skulbah NEHU ban wanrah ïa ka Marking System kaba khuid ba suba.”
Haba bynrap halor kane jingdawa ban wengkam ïa u Rohit Prasad, u President jong ka NEHUTA, u Prof. Lakhon Kma u la ong, ba ka Joint Action Committee (JAC) kan ai por haduh ka por 12 baje mynmiet jong ka 26 tarik, Risaw, 2023 ban wengkam mardor ïa u Rohit Prasad hynrei lym kumta ka Joint Action Committee kan pynlong da ka jingïakhih hakhmat ka ophis treikam jong u Vice Chancellor.
U la ïathuh ruh ba ka JAC ka la dawa ruh ïa u Prof.PS Shukla ban pyndam noh mardor ïa ka post Campus Director ba la thung hapoh ka Tura Campus hynrei ban thung beit da u Pro. Vice Chancellor kumba ju long hi ka rukom katkum ki kyndon treikam jong ka skulbah NEHU.