Ka sorkar ka sngewthuh ïa ka jingsngew kiba bun, yn kiar ban pynlong tamasa ha ka Sngi U Blei: Prestone Tynsong

Shillong, Risaw 26: U Bah Prestone Tynsong, Symbud Myntri Rangbah ka jylla, u la ong ba ka sorkar ka sngewthuh ïa ka jingsngew jong ki paidbah ha kaba ïadei bad ka jingpynlong tamasa ha ka Sngi U Blei.
Hynrei ha kaba ïadei bad ka Cherry Blossom Festival mynta u snem kaban long naduh ka 17 haduh ka 19 tarik u Naiwieng, u Bah Tynsong, u la ong ba ka long ka bym lah shuh ban kiar. Hynrei ka sorkar ka la bthah ba ha ka 19 tarik, ka Sngi U Blei, yn sdang noh ha ka por 3 baje janmiet, kata hadien ba la wai jingïaseng.
“Ka ju jia ryngkhat ba haba buh tarik ïa ki tamasa, ka ju ïahap ha ka sngi sdang ne sngi pynkut ha ka Sngi U Blei. La shem snem te ngin peit bha noh bad ngin ïaleh ban kiar ïa ka Sngi U Blei”, la ong u Bah Prestone.
Ha kajuh ka por u Symbud Myntri Rangbah u la ong ba ka sorkar ka sngew burom ïa ka jingsngew ki nongïalam niam, ki Sengbhalang bad kiwei kiwei halor ka jingpynlong tamasa ha ka Sngi U Blei, hynrei u kyntu ïa baroh ban ïa kyrshan lang na ka bynta ban pynlong ïa ka Cherry Blossom Festival kaba ïaid beit ïaid ryntih.