Sdang pynkhreh elekhon MP ha Eastern West, mynta yn pynmih ki kyrteng thep vote

Mairang, Risaw 26: Ka ophis jong u District Election Officer ka Eastern West Khasi Hills District, ka la nang pynkhreh shaid shaid ïa ka elekshon sha Lok Sabha, kaba la mang ban pynlong ha u snem 2024.
U District Election Officer, uba dei u DC ka Eastern West, u Bah G. Kharmawphlang, IAS, haba ïakren bad ki nongthoh khubor, u la ong ba kane ka jingpynkhreh ka long da kaba pynmih paidbah ïa ka Draft Electoral Roll ha ka 27 tarik mynta u bnai. Nangta ha kane kajuh ka sngi, yn sam ïa ki Draft Electoral Roll sha ki Political Party ha Conference Hall, DC ophis por 11 baje mynstep.
U Bah Kharmawphlang, u la ïathuh ruh ba ka por na ka bynta ka claims and objections lane ka jingpan rung kyrteng bad pyrshah, nangta ban aplai EPIC thymmai ban pyndam noh ïa ki kyrteng jong kiba la khlad ne phet shnong na ka electoral Roll, nangta ban pynbeit ïa ki jingbakla bad kiwei kiwei ha ka Electoral roll kan long naduh ka 27 tarik u Risaw haduh ka 9 tarik u Nohprah 2023.
U DEO, u kyrpad ruh ïa ki paidbah khamtam ïa kito ki Khynnah samla kiba la kynjoh ïa ka 18 snem ka rta ne kito kiban sa kynjoh 18 snem ka rta ha ka 1.1.2024 ba kin ïakynduh ïa ki BLO ha shnong jong ki ne ki lah ban wan mih sha ophis jong u DC ne ban pyndonkam ïa ka Voter Helpline App ne leit sha ki Common Service Centres ban pynrung kyrteng ha ka thup thep vote.
Shuh kino kino kiba kwah ban weng noh ïa ka kyrteng jong ki ne jong ki bahaiing naka elcectoral roll ba kin sngewbha ban leh ha shwa jong ka 9/12/2023 bad kiba kwah ban apply thymmai ïa ki EPIC na ka daw ba ki la jot, ne jah ne pynbeit ia ki jingbakla ne ban mark PWDs ba kin shim khia ha kine ki sngi ba la buh. U Bah Kharmawphlang, u kyrpad ruh ïa ki Sordar Shnong ki representative jong ki political Party lyngba ki Booth Level Agents ban ïarap ban pynsaphriang bad pynsngewthuh jingmut ïa ki briew ba ka EPIC ka long kaba donkam ba kin leh ïa kaba donkam ha ka por ba biang.
Nangta ha ka 11 bad 18 tarik u Naiwieng mynta ka snem, kiba dei ki Special Campaign Dates, ki BLO kin don ha ki Polling Station baroh shisngi. Kumta ki paidbah ki lah ban iakynduh ia ki kyrpang ha kitei ki sngi.
Ïa ka Final Electoral Roll yn sa pynmih ha ka 5 tarik u Kyllalyngkot 2023.
Shuh shuh u DC u pyntip ruh ba naduh mynshem snem ïa ki EPIC la print ha kawei ka firm kaba don ha Hyderabad bad ka shimpor katba kin da poi ha ophis. Kumta yn sa pynpoi pat sha ki paidbah lyngba ki Post Office ne BLO. Te kumta ki paidbah ki dei ban leh ïa kaba donkam ha ka por ba biang.
Ha kajuh ka por u DC u kyntu ïa ki paidbah ruh ba kin pyndonkam hok ïa ka vote ka jong ki ha kaba ki nongthep vote kidei ban ïa mih paidbah ban leit sha ki polling station ha ka sngi thep vote ban jied ïa u nongmihkhmat sha ka Dorbar Thaw Ain (Parliament) ba phin jied ïa u MP uba idei ba leit mih khmat sha Lok Sabha.