La jyllei da ki bar jylla ba trei ïa ki kam khaïi ha Shallang, pyntip ka HYC ha u CEM
Pynkynmaw ban tei mot ïa u Bah Hopingstone
Shillong, Risaw 26 : Ka HYC West Khasi ha ka sngi Palei ka la pyntip sha u CEM ka KHADC, Bah Pynïaid Sing Syiem ba ha Shallang la jyllei da u bar jylla ba leh ïa ki kam khaïi pateng namar ka jingïohlad ki briew kiba nabar ban wan seng kam.
Haba kren bad ki lad pathai khubor, u President ka HYC West Khasi Hills, Bah Lumlang Kharsyiemlieh u la ong, “Ka iew Shallang mynta la ka la kynrei bha da ki briew kiba nabar kiba wan khaïi. Kumta, ngi kyrpad ïa ka District Council ban peit bha bad ban ym pynthymmai shuh ïa ki trading licence lane ai thymmai namar haduh mynta 70 persen la dap da ki bar jylla.”
Ka seng ka la pynkynmaw ruh ïa u CEM ba ki don ki CEM barim kiba la kular ban tei mot ïa u Bah Hopingstone Lyngdoh Nonglait hynrei katei ka khlem urlong haduh mynta. Halor kane, la ïathuh ba u Bah Pynïaid u la kular ba un shimkhia mardor ban mang pisa na bynta ban tei ïa u mot dur ba shi rynïeng jong utei u rangbah uba la mihkhmat haduh 36 snem ha KHADC.
Na ka liang ka Seng ka kyntu ruh ïa ka KHADC ba kan phah thung dieng noh ha ka jaka ba heh jong ka Council kaba don ha katei ka distrik kum shi bynta ban pynneh pynsah ïa ka mariang.
Kawei pat ka mat kaba ka seng ka phah tuklar ha u CEM ka long halor ka jingai jingbit ki nongsynshar shnong ïa ki briew kiba nabar ban wan trei hapoh shnong lyngba ka Post Gramin Bak Sevak (GDS) nalor kiwei kiwei.