Shillong, Risaw, 26: Da ka jingïakhih kaba tyngeh haduh lai bnai kynthih jong ki nonghikai ka skulbah NEHU kiba don hapoh shatri jong ka North Eastern Hill University Teachers Association (NEHUTA), u Vice Chancellor Prof. PS Shukla u la hap ban pyndem da kaba khot ïa ka jingïalang jong ka Academic Council ban ïoh ïa ka jingmynjur ha kaba ïadei bad ka jingpyntreikam ïa ka National Education Policy (NEP), 2020.
Ha ka jingïakren bad ki lad pathai khubor hadien ba la wai ka jingïalang jong ka Academic Council kaba la long ha ka sngi Palei u President jong ka NEHUTA Prof. Lakhon Kma u la ïathuh ba ka jingpyrshah jong ka Assocation ban pyntreikam ïa ka National Education Policy (NEP) 2020 naduh lai bnai mynshwa ka long namarba u Prof. Shukla u la iuhroit ïa ka iktiar jong ka Academic Council da kaba ñiew pynbna ïa ka Executive Council kum ka bor kaba halor jong ka skulbah NEHU.
U la ïathuh ba ha kane ka jingïalang jong ka Academic Council, la shim ïa ka rai ban pyntreikam noh nangne shakhmat ïa ka National Education Policy (NEP) na ka bynta ka Four Year Undergraduate Programme (FYUP) bad ha kaba ïadei bad ki samla kiba dang pule ha ka First Semester ka North Eastern Hill University Teachers Association (NEHUTA) ka la dawa ïa ki bor pynïaid ban pynjlan shwa ïa ka jingai jinghikai sa shi bnai kynthih hynrei ym ban shu pynlong noh ïa ka eksamin ha u bnai Naiwieng lane Nohprah, 2023 namarba ki samla pule ki la shu duhei ïa ki jingïoh jinghikai na ka daw ka jingbym ïasngewthuh jingmut hapdeng ka North Eastern Hill University Teachers Association (NEHUTA) ka Meghalaya College Teachers Association (MCTA) bad u Vice Chancellor jong ka skulbah NEHU u Prof. PS Shukla.
“Ka kam kaba tang shiteng kynta, yn hap ban ïakhih haduh lai bnai ka la pynduhnong haduh katta katta ïa ki samla pule. Mynta ngi kyrmen ba un (Vice Chancellor) un pyntreikam ïa kaei kaba la mynjur hapoh ka Academic Council. Kane ka dang dei tang ka jingjop kaba rit bad kin dang don shuh shuh sa kiwei pat ki jingdawa kiba ngin dang ïakhih nangne shakhmat,” la ong u Prof. Kma.
U la ïathuh ba kane ka jingpyndem jong u Prof. Shukla ka long hadien ba ka NEHUTA ka la ujor sha ka President jong ka Ri India ka Droupadi Murmu bad sha u Lat ka Jylla u Phagu Chauhan.
Shuh shuh u la ïathuh ba ka jingkhot jong u Prof. Shukla ïa ka jingïalang jong ka Academic Council ka long hadien ba ka jingaipor khatduh jong ka Joint Action Committee (JAC) kaba kynthup ïa ka NEHUTA, NEHUNSA, MCTA, MeTTA-NEHU, NEHUSU bad kiwei kiwei ki kynhun kiba ïasnohkti lang kan kut lashai ka sngi Thohdieng.
