Shillong, Risaw 26 : Ka Hynñiewtrep Achik National Movement South East Khasi Hills Sohra ryngkat ka jingsynranlang ki nongïalam ka HANM Seng Kmie, mynta ka janmiet sngi Palei ka 26 tarik Risaw 2023, ka la leit ban ïakynduh ïa u CEM ka KHADC u Bah Pynïaid Sing Syiem ban pyrshah bad ban kyntu ban ym ai trading licence ïa ki bar kiba pyntrei ïa kiba bunjait ki kam ba katei ka thaiñ.
U Bah Danmurphy Nongbri uba dei u finance secretary, haba kren sha ki lad pathai khubor u la ïathuh ba ka la don ka jingleit pan NoC jong ki bar jylla na u Syiem ka Hima Sohra hynrei u Syiem bad ka Hima ki la kyntait. Kumta ki bar jylla ki la leit ban tied jingkhang noh sa sha ka ïing bishar ba don burom jong ka Meghalaya High Court bad na ka liang ka iingbishar ha ka 4 tarik Risaw 2023 ka la bthah ïa ki bar jylla ba kin leit pan na ka KHADC.
Kumta shuwa ba ki bar jylla kin leit ban pan ïa ki trading licence, ka seng ka la kyntu ïa ka KHADC lyngba u CEM ban ym ai khlem da ïoh shuwa ki NoC na ki nong synshar Shnong jong ka thaiñ Sohra.
U la ïathuh ba ïa ki trading licence katkum ka regulation Act 1954 ki bar jylla kidei ban ïoh tang shi snem hynrei ki don pat kiba ïoh haduh shiphew haduh laiphew snem tam kumta halor kane ruh ka seng ka pyrshah jur. U la ïathuh ba na ka liang ka KHADC kan don ryngkat bad ka seng ha kaba ïadei bad ka jingkhanglad ban ai trading licence pathar ïa ki bar jylla.
