Nongpoh, Naiwieng 08: U District Magistrate ka Ri-Bhoi District u Abhilash Baranwal u la pyntip bad pynmih da ka hukum ba yn khang pyrshah ïa baroh ki kam um ha Pung Umiam naduh ka ñiah lieng, ka khwai dohkha bad kiwei kiwei haka 14 tarik Naiwieng namar ka tnad Transport jong ka sorkar jylla kan pynlong ïa ka jingwan hiar jong ki liengsuiñ kiba lah ban hiar ha um ha ka Pung Umiam.
La pyntip ruh ba katei ka jingwan hiar jong ki liengsuiñ um kan ktah ïa ki kam ba man ka sngi naduh ka ñiah lieng ka khwai doh bad kiwei kiwei ki jait kam kiba ïadei ha um bad la mana ïa ki paidbah ban don harud um kaba lah ban buh jingma ïa ki, namarkata ban lait na kano kano ka jingma jingmynsaw la kyrpad ïa ki paidbah ban kiar ban hiar sha um bad ban nym pynthud ïa ka jingwan hiar jong ki liengsuiñ haka 14 tarik Naiwieng naduh ka por 7 baje mynstep haduh 1 baje janmiet.
Kino kino kiba pynkheiñ ïa katei ka hukum kin ngat haka jingpynshitom hapoh ka kyndon aiñ 223 jong ka Bharatiya Nyaya Sanhita, 2023 bad ïa katei ka hukum yn pyntreikam da ki pulit ka Ri-Bhoi, MeECL, bad ka tnad Transport.
