Shillong, Lber 23 : Ka Meghalaya kan sa leit ban ïashim bynta ha ka lympung ïalehkai kriket jong ka 1st NECDC Interstate Friendship Tournament 2023 ba pynïaid da ka North East Cricket Development Committee. Ha katei ka lympung kin don hynriew tylli ki jylla kiba dei jong ka North East Zone jong ka BCCI.
Ïa katei ka lympung yn pynlong ha Nagaland kaban sdang naduh ka 29 tarik Lber bad kaban kut ha ka 3 tarik Ïaïong 2023.
Ka NECDC ka kynthup ïa ka Meghalaya, Nagaland, Manipur, Sikkim bad Mizoram ïa kaba la seng ha u 2016 ban pynthikna ka jingïatylli kum ki jylla ka thaiñ North East ban pynkhlaiñ bad ban long ki dkhot ba shirta, da kaba ïashim bynta ha ka Ranji Trophy bad ha kiwei kiwei ki tournament ba pynïaid da ka BCCI, nalor ki jingïalehkai bad ban nang kyntiew ïa ki jaka ïalehkai.
Ha katei ka lympung kaba dei ka jingïalehkai one day, kin don hynriew tylli ki jylla ba la phiah ha ki ar tylli ki group kaba don lai tylli, da kaba pynlong da ka jingïalehkai group stage bud pat ka semifinal bad ka phainal, pynbna u Naba Bhattacharjee uba dei u Co-Convenor jong ka NECDC. Ïa baroh ki jingïalehkai yn pyni paidbah (live).
Kane ka lympung kadei ka lympung ïalehkai ba ka BCCI ka pynlong manla u snem bad ka NECDC ka thmu ruh ban pynlong ïa ka jingpynïalehkai na ka bynta ki kynthei kiba dei jong ka kynhun senior bad kumjuh ruh ha ki kyrdan bapher bapher.
U Bhattacharjee, uba dei ruh u Convenor jong ka selection committee ka North East Zone Duleep Trophy, u la ïathuh ruh ba nalor ka ki hynriew tylli ki jylla kiban ïalehkai, kiba lah ban ïalehkai bha ha katei ka tournament ka la buh ruh kum kawei na ki rynsan ban jied ha ka kynhun ïalehkai zone.
