Jowai, Lber 31: Ka lympung ïalehkai phutbol kaba la tip da ka 10th Secondary School Football Tournament 2023-24, ba la pynlong daka Dorbar Shnong Pdengshakap, ha kane ka sngi saitjaiñ jong ka taïew bala dep ka la ïoh ban pyndep ïa ka jingïalehkai Semi-Final ba khatduh hapdeng ka YFC Trangblang pyrshah ïaka Thun FC, ha kaba ka Thun FC ka la khur ïa ka jingjop da 2-1 kol.
Haba phai sha ka jingïakhun, dei ka YFC Trangblang kaba la ïoh pynkhihjar nyngkong lyngba u Joseph haka minit ba 40 bad ban lamkhmat ruh ïa ka jingïalehkai ha ka kylla step.
Hynrei tang kumba katto katne por ba la ïaid ki minit ha ka kylla miet, ka Thun FC kala ïoh pynphai lyngba u F. Syndai haka minit kaba 65 shuwa ba u Zaza un thep ïa ka kol pynjop ha ka minit ba 69.
Kumta lyngba kane ka namjop ka kynhun Thun FC kala ïoh ban buh jaka ïalade ha ka final jong kane ka Tournament. Lah ban kdew hangne ba ki kynhun ban ïaknieh ïa ka namlahduh ha kane ka Tournament ki long hapdeng ka Rymbai Shkenshynriah SC bad ka Thun FC.
La pyntip ka jingïalehkai Final jong kane ka Tournament kan long haka 20-4-2024 haka por 1 baje nohphai sngi hapdeng ka Rymbai Shkenshynriah SC pyrshah ïaka Thun FC.
Naka liang jong ka Tournament Committee Pdengshakap lyngba ka kyrwoh bala phah da u Sports Secretary bah Oriswell Khyriem sa shisien ka khot bad wer lang ïa baroh ki pait ieit football jong ka thaiñ ban wan sakhilang ïakane ka jingïalehkai Final.
