Shillong, ïaïong 01: Ka kynhun ki nongïalehkai Wushu hapoh ka lama jong ka Meghalaya Wushu Association (MWA) ka la ïoh ban wanrah kawei ka takma ba la khur na ka 23rd Sub Junior National Wushu Championship ba la long ha Indoor Hall Bhagwati Nagar, Jammu
University.
Ha kane ka kynti, ka jylla ka la phah hynriew ngut ki nongïalehkai ba kynthup kawei ka kynthei bad san ngut ki shynrang: Ethan Nongdhar, Daomanmi Mynsong, Steven K.Thabah, Pyniohnam Marboh, Bishar Lyngdoh Nongpiur bad ka Siselia Dkhar hapoh ka jingïalam jong u Bah Niawki Lakai NS NIS Wushu Coach jong ka MWA na looksi, West Jaintia Hills District.
Baroh hynriew ngut ki la leit ban ïashimbynta ha rynsan ïakhun jong ka 23rd Sub-Junior National Wushu Championship bad ka Junior Khelo India Women’s League ba la pynlong ha Indoor Hall Bhagwati Nagar, ba la sdang naduh 26 tarik haduh 31 tarik u Lber, 2024.
ïa kane ka lympung la pynïaid da ka J&K WUSHU Association hapoh ka jingkhmih jong ka WUSHU Association of India (WAI), ha kaba ka jylla ka la ïoh ban khur kawei ka takma rnong ba la jop da u Ethan Nongdhar na ka shnong Lumparing, Shillong u ba dei u khynnah ba shah hikai ha u Bah Pynshai Mawri (Coach-State Wushu) na Mawlai Phudmawri.
U Pyniohnam Myrboh na Kharang, u Daomanmi Mynsong na Jongksha bad u Steven na Madanrting ki la shah pynliem noh ha ka jingïakhun Quarter Final, katba ka Siselia Dkhar na East Jaintia Hills District, ka ruh ka la liem noh ha ka jingïakhun Quarter Final ha ka Khelo India Women’s league.
