Shillong, ïaïong 01: Ka tnat Sports & Youth Affairs jong ka sorkar jylla ka la pynbna ba ka Cash Award Scheme na bynta ki nongïalehkai Sports (sportsperson) ha u snem 2022 ka long kum ka atiar ban pynshlur ïa ki nongïalehkai (athlete) bad ki coach kiba la seisoh ha ki kyrdan ïalehkai jong ki. Naduh ba la pyntreikam, palat 3500 ngut ki nongïalehkai Sport kumjuh ruh ki coach na ki 30 tylli ki jait jingïalehkai (Sporting Discipline) ki la ïohpdiang ïa kane ka khusnam, ha kaba ka jinglut ka la kot 6 klur.
Ha kaba ïadei bad ka jingkynthoh ba la wan na katto katne ki dkhot Associations, na ka liang jong ka Directorate of Sports & Youth Affairs ka la pynbna ba kan ïai bteng ban wan jingmyntoi bad lad jingïarap sha ki nongïalehkai lyngba kane ka Scheme.
Shuh shuh, na ka liang jong ka Department ka la shimti ban khmnih bñiah khang ban pynthikna ïa kiba dei hok ban ïoh khnang ban long kaba ïaid beit watla don katto katne ki application kiba la phah sha ka Department. Tang ha u Rymphang 2024, palat 1300 ki khusnam pisa (cash award) ba la kot haduh 2 klur la ïoh ban pynlut, kynthup ruh ïa ka jingsam khusnam ba dang shen ha ka 14 tarik u Lber, 2024. Kin nang don shuh kum kine ki rynsan ki ban sa pynbna ha kine ki bnai ban wan na bynta ban pynkup burom ïa baroh ki kyrteng kiba la shah jied.
Kane ka Cash Award Scheme ka dei na bynta ki Athlete bad ki Coach jong ka jylla Meghalaya kiba la jop takma ha ki kyrdan lehkai hapoh ka State, Regional, National, lane International Events.
Kane ka Cash Awards ka dei ka jingsiew kaba tang shi sien, bad kumba 75 Lak na bynta kiba khur takma ksiar ha ka Olympic. Nangta kane ka Cash Award ka ïapher ha ka jingïoh katkum ki kyrdan: kiba khur takma ha ka Senior, Junior, bad Sub- Junior, ka rukom kaba man ki jylla ki bud ryntih haba sam ïa ki Cash Award katkum ka polisi na ka Ministry of Youth Affairs & Sports.
Nalor ka Cash Awards Scheme, ka Sports Scholarship Scheme kadei kawei pat ka atiar kaba ka sorkar ka la shim ban pynshlur ïa ki khynnah ïalehkai ka jylla Meghalaya. Lyngba kane, la mang 60,000 shi snem (Rs. 5000 shi bnai). Kumba 350 ngut ki nongïalehkai Sport ka jylla ki la ïoh jingïarap lyngba kane ka Scholarship na bynta u snem 2024-25.
La pyntip ruh ba ki nongïalehkai ki lah ruh ban leit phah ïa ki application sha ka Directorate of Sports & Youth Affairs lyngba ki kyrteng ba la dep register ha ka Sports Association for training/travel/logistics funding support.
Na ka liang jong ka tnat ba dei khmih ïa ka Sport ka kyntu ïa ki nongïalehkai ki sport bapher bapher kumjuh ruh ki coach jong kiba bun ki sports association ba kin wad jingtip ba kham bñiah bad ban phah ïa ki application sha ki ophisar ka association/district sports ban pynthikna ba baroh kin ïoh jingïarap lyngba kane ka scheme.
