Mawkyrwat, ïaïong 01: Kum shibynta ban kyntiew ïa ka kam ïalehkai hapoh jong ka South West Khasi Hills District, ha ka 30 tarik u Lber, 2024 la plie paidbah ïa ka K&K Football Arena kawei na ki madan jingïalehkai Futsal ha Shnong Nonglang, South West Khasi Hills District ha kaba u bah Jesland Roy Nongsiej u la long kum u kongsan.
Ïa kane ka madan ïalehkai la pyntrei da ki ar ngut ki samla kiba la buh ïa ka kyrteng ‘K&K’ ha ka jingmang pisa kaba 50 lak ei ei bad ba la plie paidbah da u bah Jesland Roy Nongsiej kum u kongsan ryngkat ka jingïadon lang u bah P. Wanniang kum u symbud kongsan.
Shuh shuh ïa kane ka madan la ai kyrteng K&K Football Arena kaba mut ‘Ken & Ki’ ha ka jingsien kyrteng bad kiba ka kyrteng pura jong ki ka long u Cannyson Nikton Marbaniang bad u Banshanboklang Khardewsaw kiba long ruh ha kajuh ka por k um ki trai jong ka madan.
U bah Jesland Roy Nongsiej haba kren kum u kongsan u la pynpaw ka jingaikhublei na ka bynta ki ar ngut ki samla jong ka dong ka thaiñ kiba la buh da ka kyrteng “K&K” kiba la don shisha ïa ka jingïohi jngai ban leh ei ei na ka bynta ka jingmyntoi jong ki nongïalehkai khamtam eh ka ban long ruh ka jingaimynsiem ruh wat ïa kito ki rangbah kiba la sdang ban noh ka met ba kin ïoh biang ka lad ka lynti ban ïalehkai lyngba ka jingshna jong ki samla ïa ka madan ïalehkai Futsal.
Shuh shuh u la ong ruh ba kine ki ar ngut ki “K&K” ki la thaw ruh ïa ka history hapoh jong ka South West Khasi Hills District kaba ma ki ki la shna ïa kane ka madan ïalehkai Futsal ha kane ka jaka kaba hap ha Shnong Nonglang. Namarkata, u la ong ruh ba kum ka sorkar ka dei ban ai ka jingkyrshan kaba pura ïa kum kine ki samla kiba don shisha ka jingthmu ba bha ban kyntiew ïa ka dong ka thaiñ lyngba ki bynta bapher bapher katkum ka jinglah jong ki.
“Ha kano kano ka jingjop jong u briew don ka longkmie bad kumta ruh ha kano kano ka jingjop jong u khun ne ka khun don ki kpa kiba kyrshan na sha lyndet”, pynkynmaw u bah Jes bad kumta ruh ha ka jingjop jong ki ar ngut ki “K&K” ka long da shisha ka jingkyrshan ba rad bah jong ki kpa jong ki. U la ong ruh ba lyngba ka jingpyni lynti jong kine ki ar ngut ki “K&K” kan sa pynpyrkhat ruh ïa kiwei ki samla kiba la nang la stad bad kiba biang ka kamai ka kajih ba kin leh ei ei ïa ka dong ka thaiñ lyngba da kiwei pat ki lad ki lynti kiba khambha.
U don ruh ka jingkyrmen ba lyngba kane ka madan Futsal kan sa long ka jingkyrkhu ïa ki khunsamla jong ka dong ka thaiñ bad kham kyrpang ïa kito ki samla kiba la sdang ha ki jingmlien kiba sniew namar lada ma ki kin mih shakhmat ban wan kilanmet lyngba ki jingïalehkai kan sa long kawei ka lad ba ma ki kin lait na ki jingsniew ba bun jait.
Kiba ïa donglang ha kane ka sngi ki long naduh u bah P. Wanniang, General Secretary ka MDSA kum u symbud kongsan, kiba ha ïing jong ki ar ngut ki samla kiba la pyntrei ïa ka madan, bad ki ‘riew rangbah kiba la shah khot sngewbha. Ka jingrwai kyrpang na u samla Valdony Mawlot bad kumjuh ruh ka jingïalehkai paralok.
Ïa ka jingïalang la pynïaid da u bah Downingstar Marweiñ bad ka jingkren khublei na u bah Cannyson Marbaniang.
