Shillong, Rymphang 27: Ka Cricket Lovers bad ka Sohra Combines ki la jop ïa la ki jong ki jong ki jingïakhun semifinal hynne ka sngi Palei haka lympung 4th District League T20 Cricket Tournament 2024, kaba la pynlong da ka East Khasi Hills Cricket Association [EKHCA], ha Sohra. Kumta da kane ka namjop kine ki ar kynhun ba dang sah kin sa ïakynduh ha ka final ban ïaknieh ïa ka nam lahduh.
Ha ka semi final kaba nyngkong ka Cricket Lovers ka la pynliem ïa ka Laitjem CC da 72 ron shuwa ba ka Sohra Combines kan pynliem ïa ka Friends United da 66 ron.
Ka jingïakhun kaba nyngkong la sakhi ïa ka Cricket Lovers kaba la ïoh ban tied nyngkong hadien ba jop ïa ka jingkynting pisa (toss) ha kaba ka la lah ban kamai 185 ron haduh kaba kut jong ka 20 ober bad khyllem 9 wiket, u Shavian Blah u la lamkhmat napdeng ki nongtied da kaba kamai 69 na ki 40 tylli ki bol. U Newrilang Wankhar u la lah ban lehbha ha ka bowling na ka bynta ka Laitjem, da kaba khur 4/27 na ki 4 ober.
Related Posts
Haba jubab, ka Laitjem ka la shah khanglad noh tang na bynta 119/9 naki 18.4 ober, bad u Poilang Thawmuit u la long uba kongsan ha ka tied da kaba kamai 21 ron naki 27 bol. U Damechwa Khongsngi u la ïoh ban khur 2/8 naki 2 ober ha kaba u la khur syndon ïa ka khusnam Player of the Match.
Hadien kane, ka Sohra Combines ruh ka la rai ban tied nyngkong hadien ba jop ïa ka jingkynting pisa (toss) bad ka la lah ban tied pyndep ïa ka 20 ober ban 170 ron bad khyllem 7 wiket, u Ryan Emi Swer u la long uba kongsan tam ha ka tied da kaba kamai 36 ron naki 22 tylli ki bol. Napdeng ki rangkawang bol, u Nangkiewdor Moore Don u la khur 2/33 naki 4 ober.
Haba pyrshang beh ïa ka thong, ka Friends United kam shym la lah ban pynurlong katkum ka jingdonkam, ha kaba ka la lah ban kamai tang 104 ron haduh kaba kut jong ka 20 ober bad khyllem 8 wiket. U Nangkiewdor u la kamai 41 ron naki 38 bol. U Kevin Diengdoh u la long uba kongsan ha ka bol da kaba khur 3/28 naki 4 ober, hynrei ïa ka nam Player of the Match la khur da u Ryan Emi Swer.
Na bynta ka jingïakhun final, ka ban long hapdeng ka Cricket Lovers bad ka Sohra Combine, la buh ban pynlong ha ka 01 tarik u Lber, 2025, ha ka por 10 bej mynstep.