Shillong, Rymphang 24 : Ka Voice of the People Party (VPP) ka la ïoh ban sar naphang ha ka elekshon MDC ha KHADC da kaba jop haduh 17 tylli ki seat katba ka National People’s Party (NPP) pat ka la ïoh ban jop haduh 13 ngut ha ki constituency jong ka JHADAC na ki 29 tylli ki constituency.
Ha KHADC, nalor ki 17 tylli ki seat ba ka VPP ka ïoh, ka United Democratic Party (UDP), kaba dei ka paralok ba ïatreilang bad ka NPP ha ka sorkar MDA ka la wan ba ar da kaba jop jop 5 tylli ki seat, bud saa ka NPP da 4 tylli ki seat, nangta arngut Independent bad uwei na ka Hill State People’s Democratic Party (HSPDP).
Nalor kine ki la don ruh haduh lai tylli ki seng saiñpyrthei kiba khlem jop satia wat tang iwei ruh ha kane ka elekshon MDC bad kine ki kynthup ïa ka seng Congress, ka KHNAM bad kumjuh ka BJP.
Ha kane ka kynti, ka VPP ka la lah ruh ban pynliem ïa u CEM barim ka Council, Bah Pynïaid Sing Syiem na Nongthymmai bad kumjuh ïa u Chairman Bah Lamphrang Blah na Mawphlang constituency.
Ha Mawphlang u kyrtong ka VPP u Bah Lancaster Marbaniang u la pynrem ïa u Chairman barim ka KHADC bad uba la long MDC ruh la saw sien Bah Lamphrang Blah da kaba u la tam 6038 vote.
Katba u kyrtong VPP na Nongthymmai u Bah Winston Tony Lyngdoh u la pynrem ïa u CEM ka KHADC u Bah Pynïaid Sing Syiem (NPP) da kaba tam 3832 vote bad u kyrtong ka VPP na Mawkhar-Pynthorumkhrah u Strong Pillar Kharjana ua la lah ban pynliem ïa u DyCEM barim u Bah Pynshngaiñ N Syiem da 2540 vote.
Ka party ka la leh bha ha ki constituency jong ki 4 ngut ki MLA ka VPP ha kaba u Eddieson Kharumnuid na Mawlai u la jop da 12347 vote, u Bah Bill C Wankhar na Sohryngkham u la ïoh 6752 vote, u Bah Kitborlang Syiem na Nongkrem u ba la jop da kaba tam 2250 vote bad u Bah Denzil R Chen na Jaïaw u la jop da kaba tam 1905 vote.
Kiwei pat ki kyrtong ka VPP kiba shah jied kum ki MDC ba thymmai sha KHADC ki kynthup ïa ka Kong Aibandaplin L Nonglait na Mylliem kaba la ïoh 11,225 vote, u Bah Seiborlang Warbah na Mawkynrew da 7959, u Bah Shemborlang Rynjah na Langkyrdem-Laitkroh u la tam da 1489, ka Kong Deity Majaw – Laitumkhrah-Malki ka la tam da 819.
Ki 5 ngut ki MDC ba ka UDP ka jop ki kynthup ïa u CEM barim ka KHADC bad u nongïalam ka Liang Pyrshah, Bah Titosstarwell Chyne u la jop biang na Sohra da kaba jop bad tam 863 tylli ki vote, katba u Bah Synshar Kupar R Thabah ba dei ruh u MLA ka Sohiong u la jop na Nongspung-Sohïong da kaba tam 281 ki vote katba u MLA ka Ranikor Bah Pius Marweiñ u la jop na Langrin da kaba tam 2899 vote. Ha kajuh ka por u kyrtong ka party na Shella u Bah Barikupar Synrem u la tam da ki 532 vote ïa u kyrtong ka NPP.
Ki 4 ngut ki MDC kiba jop na ka NPP pat ki kynthup ïa ka Kong Grace Mary Kharpuri na Nongshken kaba la tam da 3313 vote katba u Bah Alvin K Sawkmie pat u la jop na Mawsynram da ki 5035. Nangta ka kyrtong na Nongpoh Kong Rona Khymdeit ka la jop da ki 3644 vote katba u kyrtong na Jirang ba dei ruh u MLA Bah Sosthenes Sohtun u la jop da ki 7832 vote.
Ki don ruh arngut ki kyrtong shimet kiba jop bad kine ki kynthup ïa u Bah Ricky Shullai na Laban-Mawprem uba la jop da kaba tam haduh 1023 vote katba u kyrtong na Rambrai Bah Lurshai Kharbani u la jop da kaba tam haduh 2142 vote.
Haba phai pat sha JHADC, jan san ngut ki CEM barim jong ka Council ki la shah jied biang sa shisien kum ki MDC ba thymmai. Kine ki kynthup ïa u Ma Thombor Shiwat na Moodop Umladang, uba la pynliem noh da tang 102 vote, nangta kiwei pat ki CEM barim kiba jop ki kynthup ïa u Ma Hambertus Nongtdu, Ma Madonbai Rymbai, Ma Andrew Shullai bad u Ma Moonlight Pariat.
Ki 13 ngut ki MDC ba ka NPP ka ïoh ha kane ka kynti ki kynthup ïa u Ma Het Pohthmi – War West (jop da 474 vote), Jesse Suiam na Moodymmai-Nongkroh (433), Reformingson Lamare na Nartiang-Wahïajer (278), Thombor Shiwat na Moodop-Umladang (102), Pheinshwa Nanglein na Mynsngat-Khanduli (301), Aiborlang Shadap na Barato-Mukroh (140), Wormandship Shadap na Mowkaïaw (790), Bisonroy Ïano na Raliang (984), Mihnyngkong Sutnga na Shangpung (1247), Seiborlang Shadap na Sutnga-Narwan (857), Hambertus Nongtdu na Sutnga-Nongkhlieh (498), Krison Langstang na Sumer (2040) bad Sankey Shangpung na Bataw-Lakadong (1492).
Ki 8 ngut ki MDC jong ka VPP kiba jop ki kynthup ïa u Ma Jamshaphrang Pohtam na War Central (431 vote), Nehimaïa Lamare na Mukhla Ummulong (224), Laïawanlamjinghun Khynriam na Mynso-Nongjngi (1845), Daeimi Liam na Shilliang Myntang (244), Gresentus Susngi na Nangbah-Mihmyntdu (1004), Awhai Andrew Shullai na Jowai North (4602), Soki Lapasam na Muthlong-Sohkymphor (395) bad ka Kong Deivipaya T Tongper na Narpuh kaba la jop da kaba tam haduh 717 vote.
Ki lai ngut ki MDC ba ka UDP ka ïoh ki kynthup ïa u Ma Lasky Rymbai na Tuber-Wapungshnong (361), Wailadameshwa Siangshai na Musniang-Rangad (2638) bad Wonly L Chyrmang na War East (384 vote).
Ki lai ngut ki MDC jong ka Congress ki kynthup ïa u Ma Madonbai Rymbai na Amwi Khliehtyrshi (988), Rikut Parein na Saphai-Sahsniang (289) bad u Lalwilliama Theite na Saipung-Nongkhlieh (299),
Ki arngut ki kyrtong shimet ki kynthup ïa u Ma Moonlight Pariat na Jowai South (522) bad Kong Violet Lyngdoh na Rymbai-Khliehriat (1835).
