Jop ki rit ki ria pyrshah ïa ki heh saipan ieit sbai : Dr Juristman Ïawphniaw

Nongstoiñ, Rymphang 24: Ka elekshon MDC ha West Khasi Hills ka la wanrah ïa ka jingkylla ha kiba bun rukom, khamtam ha ka Constituency kaba pawkhmat da ka NPP bad Congress hynrei baroh la shah rem kput noh.
Katkum ka risol na ka elekshon MDC, u Dr Juristman Ïawphniaw u khynnah samla ba dang shu rung dang tang 2 bnai ei ei sha ka rynsan politik bad ïaleh elekshon na ka Voice of the People Party, hynrei namar ka Party ka dei kaba ieit bad shaniah da ki paidbah, u la khur ei haduh 16928 vote bad pynliem haduh 8718 vote ïa u kyrtong NPP u ba ïoh 8210 vote.
Ha Mawshynrut kaba dei ka Constituency kaba don u sitting MLA na ka seng HSPDP ka la ïoh ban jop suk da u kyrtong, kata u Bah Srally Rashir u ba la khur haduh 14067 vote pyrshah ïa u kyrtong NPP bah Gardinal Sohshang, u ba ïoh khur 10838 vote.
Ha Rambrai Jyrngam Constituency, u kyrtong shimet u ba long ruh u kyrtong jong u sitting MLA, u la khur ïa ka jingjop da kaba pynliem ïa u Bah Kimfa Sidney Marbanïang kyrtong ka NPP. Na ka liang u kyrtong shimet Bah Lurshai Kharbani u la ïoh haduh 9992 vote katba u bah Kimfa u la ïoh 7838 vote.
Ha Mawthadraishan Constituency u Bah Powell Sohkhlet na ka party Voice of the Peoples Party, u la lah ban pynliem noh ïa ka kyrtong jong ka HSPDP, ha kaba u la ïoh 16140 vote bad pynliem da 3897 vote pyrshah ïa ka HSPDP kaba ïoh 12243 vote.
Ha Mairang pat, ia ka nam jop la ioh da u MDC barim, Bah Equator Nongrang uba la pynliem noh ia u kyrtong ka VPP u John Jeffrey Basaiawmoit da ki 2858 vote.
“Ka jingkyrshan ka dei na ka bynta ka jingkyrmen na ka bynta ka lawei ki khun ki kti bad ka lawei ka ri bad ka jaidbynriew. Ha kane ka sngi ki briew ki bym ieit ïa ka spah bad ki sbai, ki la jop ïa ka jingïaleh pyrshah ïa ka jinglen donbor. Ka jingjop ka dei jong ki rit ki ria ym jong kiba ieit sbai”, ong u Dr Juristman Ïawphniaw.
U kyrtong shimet na Rambrai u Bah Lurshai Kharbani u la ong, “Ka burom ka dei nyngkong sha u Blei nongbuh nongthaw, kumjuh ruh sha u sitting MLA bad khamtam sha ki paidbah kiba la kyrshan ban pynjop ïa nga ha kane ka elekshon MDC. Kaba sah mynta ka shong sa ha u prah lada u donkam ïa nga ban don ha ka EC hynrei lada kam donkam ruh, ngan shong beit ha ka liang pyrshah”
U Bah Srally Rashir haba ai jingkren u la ong, “Nga ai khublei ïa ki paidbah kiba la kyrshan ïa nga bad kum u MDC ngan pyrshang ban ai ïa kaba bha tam na ka bynta baroh. Nalor nangta ruh ngin pyrshang ban leh ai kaei kaba ka manifesto jong ka party ka la buh na ka bynta ka ri bad ka jaidbynriew”.