Ba liem u kyrtong ka VPP hiar thma ki nongkyrshan ïa ka ïing u Rangbah Shnong ba rim ka Narwan

Shillong, Rymphang 24 : Kat kum ka khubor pulit ba la ïoh la ïathuh ba mynta ka miet ki paid nongkyrshan jong u kyrtong ka VPP na ka Sutnga- Narwan Constituency ki la hiar thma bad ther maw, bilor, dieng ïa ka ïing u Rangbah Shnong ba rim ka Narwan u ma Lam Langstang tang namar ba u khlem kyrshan ïa u kyrtong ka VPP bad tang namar ba u kyrtong ka VPP u liem ha u kyrtong ka NPP ha katei ka Constituency.
Na ka liang u SP ka East Jaintia Hills u la ïathuh mar ïa ïoh jingtip ïa kane ka jingshah pynjulor ka ïing u Rangbah Shnong ba rim ha ki nongkyrshan ka VPP mar mar u la phah pulit sha katei ka jaka ban tem ïa ka jingjia.
Haba ïakren bad ka kurim jong u Rangbah Shnong ba rim ka Kong Kristina Shadap, ka la ïathuh ha ka por kumba 8 baje ei ei kyndit kynsan kynsan la wan shi kynhun ki briew kiba dei ki nongkyrshan jong u Prah bad ki la ther maw bad pynjulor ïa ka ïing ka sem jong ki kat haduh ba ki ïit ki la pait lut bad ka ïing ruh kal a julor bun. Mar ïa jia na ka liang jong ka bad kiba don ha ïing ki la shu ïa phet iap na ïing tang ban lait na ka jingiap. Ka la ïathuh ruh ba naduh kine ki sngi shwa ka jingïathep vote ruh ki nongkyrshan jong ka VPP ki la dep maham lypa ïa ka ïing ka sem jongki ba lada jia ba u kyrtong jongka VPP um jop kin thang beit ïa ki ïing jong kito ki bym ai jingkyrshan ïa u kyrtong ka VPP ha Narwan . La ïathuh ha katei ka por ba jia katei ka jingjia ki don ki bor pulit ruh namar ki dang ïaid pahara sha katei ka jaka hynrei namar ba ki don tang khyndiat ngut kim lah leh ei ei ruh em.
Halor kane ka jingjia na ka liang u SP u la ïathuh ba la dep rejister case bad ka jingtohkit ka la ïaid shakhmat ban ïoh kem ïa kiba donkti.