Shillong, Rymphang 24 : Ka National Peoples Party (NPP) ka la rai ban thaw noh ïa ka Executive Committee (EC) ba thymmai ha Jaintia Hills Autonomous District Council (JHADC) da ka jingïatreilang bad ka United Democratic Party (UDP) bad Independent bad mynta ki la poi ka jingbun paid sha ka 18 ngut ki MDC.
Haba pynbna ïa kane hadien ba la wai ka jingïalang mynta ka sngi u National General Secretary ka NPP bad Symbud Myntri Rangbah ka jylla u ma Sniawbhalang Dhar u la ong “ Ngi ai khublei ïa ki paidbah nong Jaintia kiba la pyni bad ai ka jingshaniah ïa ka NPP da kaba pynjop don burom ïa ka party haduh 13 ngut ki MDC”.
U la ïathuh ka jingbun paid jongka NPP mynta ka la kiew sha ka 14 ngut hadien ba ka Independent MDC na Rymbai- Khliehriat ka kong Violet Lyngdoh ka la pynïasoh sha ka Party.
“Shwa ba ngin shim ïa kane ka rai ngi la ïashong jingïalang ruh bad ki MDC ka UDP kiba la jop 3 seat bad u Independent MDC uba jop na Jowai South u ma Moonlight Paraiat bad ki la rai ban ai ka jingkyrshan ba pura ïa ka NPP ban thaw ïa ka EC ba thymmai ha JHADC da kaba ngi la kot sha ka 18 ngut ki MDC” ong u ma Sniawbha.
U la ïathuh ha kane ka jingïalang la ïa mynjur lang ruh da kawei ka sur ban jied biang ïa u ma Thombor Shiwat ban shimti biang kum u CEM ka JHADC.
Halor ka jingrem jongka NPP ha KHADC ha kaba ka la jop tang 4 ngut ki MDC u ma Sniawbha u la ong “ Hooid ngi jop tang 4 ngut ki MDC ha KHADC bad ngin sa bishar bniah halor kane ban lap ïa ka daw tynrai”.
Da kaba kyntait ïa ki jingkynnoh ka VPP ba ka NPP ka pyntreikam da ka bor dohksah ban jop ha Jantia Hills, une u nongïalam ka NPP U la ong “ Ki la jop 17 ngut ki MDC ha Khasi Hills te kata ka mut ba ki ruh ki pyndonkam da ka bor dohksah? Namar kata kam don ei ei ruh em kum kata ha ka politic namar ki paidbah ki pyndonkam hok ïa ka vote jongki.
Nalor kane u la ong “ Ka VPP ka la jop tang 17 ngut na ki 29 ngut ba ki pynïakhun. Kane ka mut ba ka jingïoh jingkyrshan jongki ka la hiar bha lada ïa nujor na ka election MP ba la dep ha kaba ki la jop na baroh 29 tylli ki constituency ha Khasi Hills. Kumta tang hapdeng 8-9 bnai ki la jop tang 17 ngut ki MDC na ki 29 ngut ba ki la pynïakhun.
U la ïathuh ka MDA kan shong jingialang lashai ka sngi ban iakren halor ka election MDC.
