Liem lut naduh CEM, Dy CEM, bad Chairman barim ka KHADC – tang 4ngut kiba jop biang

Shillong, Rymphang 24 : Ka result MDC ba dang shu pynbna shen ha ka sngi Nyngkong ka la pynkyndit lut ïa baroh khamtam haba ki nongïalam ba hakhmat eh na KHADC kynthup naduh u CEM, Deputy CEM bad Chairman ba rim ki la shah rem lut ha ki kyrtong ba dang thymmai jong ka Voice of the People’s Party (VPP).
Lah ban kdew hangne ba u CEM ba rim, Bah Pynïaid Sing Syiem uba ïakhun na Nongthymmai constituency u la shah rem haduh 3832 vote ha u kyrtong ka VPP, Bah Winston Tony Lyngdoh uba la ïoh haduh 9868 vote katba u Bah Pynïaid pat u la ïoh tang 6036 vote.
Haba phai pat sha u Deputy CEM barim Bah Pynshngaiñ N Syiem (uba la resain noh katto katne taiew shwa ka elekshon), une u rangbah u la shah rem noh ha u kyrtong ka VPP hi u Bah Strongpillar Kharjana da ki 2540 vote. U Bah Strongpillar u la ïoh ban khur 6982 vote katba u Bah Pynshngain pat u la ïoh tang 4442 vote.
Ha Mawphlang Diengiei constituency pat u Chairman barim ka Council Bah Lamphrang Blah, u la shah rem noh haduh 6038 vote ha u kyrtong ka VPP hi u Bah Lancaster Marbaniang uba la ïoh ban khur haduh 12,335 vote katba u Bah Lamphrang pat u la ïoh tang 6297 vote.
Ha kane ka kynti ba mynta, bun bha ki Executive Member ki la shah rem lut bad kine ki kynthup naduh ka MDC na Umsning Kong Macdalyne Sawkmie Mawlong kaba shah rem noh tang da ki 570 vote ha u kyrtong ka VPP Bah Banrikus Nongsteng.
Kiwei pat ki EM kiba shah rem noh ki kynthup ïa u Bah Rangkynsai Kharbuki na Umroi, Bah Fantin Joseph Lakadong na Laitumkhrah Malki, Bah Carnes Sohshang na Mawkyrwat, Bah Teibor Pathaw na Mawlai (watla i la resain noh shwa ka elekshon).
Na baroh ki EM, dei tang i Kong Grace Kharpuri, MDC ka Nongshken bad Bah Alvin Sawkmie MDC ka Mawsynram, kiba la jop biang ha kane ka elekshon.
Ha kawei ka liang pat ki don tang saw ngut ki MDC kiba jop ha ka samoi ba la dep kiba la jop biang ha kane ka kynti ruh, kata da kaba kynthup lang ïa ka Kong Grace kaba la jop ha ka sien kaba saw kum ka MDC katba u Bah Alvin pat ha ka sien kaba ar. Kine baroh arngut ki dei na ka party UDP.
Kiwei pat ki kynthup ïa u CEM barim, Bah Titos W Chyne MDC ka UDP na Sohra bad u MLA ba mynta ka Ranikor Bah Pius Marwein uba la jop biang ha ka sien kaba ar kum u MDC ka Langrin constituency na ka party UDP.
La ïohi ruh ba ki don haduh saw ngut ki MDC barim kiba jop ha ki khyndiat snem ba la dep kiba la wanphai biang. Kine ki kynthup ïa ka Kong Rona Khymdeit na Nongpoh kaba la jop na ka tiket NPP, nangta Bah Ricky Shullai kyrtong shimet na Laban Mawprem, Bah Srally Rashir kyrtong ka HSPDP na Mawshynrut bad kumjuh u Bah Equator L Nongrang kyrtong ka UDP na Mairang constituency.
Ha kajuh ka por pat ki la don haduh lai ngut ki MLA kiba la shah jied biang kum ki MDC. Kine ki kynthup ïa u Bah Synshar Kupar L Thabah jong ka UDP an Nongspung – Sohiong, Bah Pius Marwein jong ka UDP na Langrin bad u Bah Sosthenes Sohtun jong ka NPP na Jirang constituency.