Shillong, Rymphang 24: U President ka Voice of the People Party (VPP) u Bah Ardent Miller Basaïawmoit u la ong ba ka party kan ïalam ïa ka Executive Committee ba thymmai hapoh Khasi Hills Autonomous District Council (KHADC) dalade bad tang marwei hadien ba la ïoh ka jingjop kaba bun paid kaba la tam ruh ïa ka magic number ha kane ka elekshon kaba dang shudep ha kaba ki result kiba la la pynbna ha ka sngi Nyngkong.
Ka VPP ka la kylla long ka party kaba heh duh tang marwei hadien ba ka la jop haduh 17 na ki 29 seat ha KHADC.
Ha kawei pat ka liang ka party ka la lah ban jop tang 8 na ka 29 tylli ki seat ha Jaiñtia Hills Autonomous District Council (JHADC).
“Nga kmen ba ngi la lah ban jop wat hapdeng kiba bun ki jingïaleh ba ngi la mad ha ki por elekshon ha kaba ngi la shah kynnoh ba ngi la long kiba pyrshah ïa ki rangbah shnong bad ki lad pathai khubor nalor ba ngi hap ïakhun pyrshah ïa ka bor jong ka pisa. Ngi sngewkmen ba ki paidbah ki la sngewthuh namar ngi kwah tang ban wanrah ïa ka synshar kaba khuid bad ka jingïakhun jong ngi kam dei pyrshah ïa ki rangbah shnong ne ki media person. Namar kata ngi ai khublei ïa u Blei bad ngi ai khublei ruh ïa ki paidbah ba ki la ai ha ngi kane ka jingshaniah. Kane kadei tang ka jingsdang,” ong u Bah Basaïawmoit.
“Ngin trei beit tang marwei bad lada kiwei ki kwah ban kyrshan ïa ka EC jong ngi, ngi kloi ban pdiang sngewbha hynrei kan ym don kano kano ka jingïateh paralok bad kino kino ki political party,” u la ong da kaba bynrap, “Ngin pdiang tang ïa ki jingkyrshan ki bym buh kyndon hynrei ym ïa kiba bun kyndon.”
Haba ïadei bad ka JHADC, u Bah Basaïawmoit u la ong, “Ngin sa shim ïa ka rai kaba dei ha ka por kaba biang.”
“Ngim pat don kano kano ka jingpyrkhat ban don kano kano ka post poll alliance. Ngin sa ïakynduh kum ki nongïalam jong ka party bad ngin sa shim ka rai kaba dei,” u la bynrap.
Ha kawei ka liang, u khlieh ka VPP u la kynnoh ba ka la don ka jingpyndonkam da ka bor kaba jur bha kaba la ktah ïa ka jingtreikam jong ka VPP ha ka thaiñ Jaiñtia Hills.
“Ngam kmen satia namar ki briew ha Jaiñtia Hills kim ïoh satia ban ïashim bynta ha ka elekshon kaba khuid bad ka laitluid ha kiba bun ki shnong. Kane kadei ka daw kaba kongsan balei ngi khlem lah ban jop kum ka party kaba bun ki MDC ha JHADC. Lada la pynlong ïa ka elekshon ha ka rukom kaba khuid bad kaba laitluid kumba long ha KHADC, ngim don jingartatien ba ngin jop ha JHADC,” u la ong.
“Haoid ngim da khuslai palat ïa ka jingpyndonkam da ka bor pisa hynrei ka jingpyndonkam jubor da ka bor ka la ktah bha ïa ngi ha kaba ki don ki dorbar shnong kiba la shah byrngem kumta kam don ka elekshon kaba khuid suba. Ngi la dep aiti ïa ka thup jong ki polling station kiba don jingma bad ym ïohi ban don wat tang uwei u pulit uba la buh ban pahara ha kum kine ki polling station,” ong u Bah Basaïawmoit da kaba kynnoh ba ka jingpulom jong ki bor pynïaid district ban shim kam ka la lam sha ka jingshah pynpait pynpra jong ki 4 tylli ki polling station ha ki artylli ki constituency ha East Jaiñtia Hills district.
