Jop ka VPP 3, NPP 2 ha Ri-Bhoi, liem lyndang lut ki sitting MDC, jah kyrteng ka UDP, Congress, BJP
Nongpoh, Rymphang 24: Baroh 4 ngut ki sitting MDC kila liem lyndang ha Ri-Bhoi District haki 4 tylli ki Constituency ba kynthup ïa u Bah Balajied Ranee MDC ka Nongpoh, ka kong Macdalyne S Mawlong MDC ka Umsning, Bah Rangkynsai Kharbuki MDC ka Umroi bad u Bah Victor Ranee MDC ka Jirang Constituency lait noh tang ka Mawhati hadien ba u Bah Charles Marngar um shym la ïakhun shuh bad ailad ban ïakhun noh da u Bah Joplin Sten.
Haba phai sha ka jingñiew vote mynta ka sngi, haki 5 tylli ki Constituency jong ka Ri-Bhoi District bala sdang naduh ka por 8 baje mynstep ka Voice of the People’s Party kala ioh ban khur haduh 3 tylli ki seat kata ha Umroi, Umsning bad Mawhati Constituency katba ka NPP kala ioh ban khur 2 tylli ki seat kata ha Jirang bad Nongpoh Constituency.
Ka jingioh vote ha Jirang Constituency ka long, u Bah Sosthenes Sohtun naka party NPP u la ioh ban khur haduh 13822 vote bad tam haduh 7832 vote ïa u Bah Victor Ranee naka party Congress ba dei ruh u sitting MDC u ba la ioh tang 5990 vote.
Ha Nongpoh Constituency ka Kong Rona Khymdeit naka party NPP kala ioh ban khur haduh 11306 vote bad tam haduh 3644 vote ïa u Bah Balajied Ranee u ba dei u sitting MDC u ba la ioh ban khur tang 7662 vote.
Ha Umsning Constituency u Kyrtong ka VPP u Bah Banrikus Nongsteng u la ioh ban khur haduh 10530 vote bad tam haduh 570 vote ïaka kong Macdalyne S Mawlong kaba dei ka Sitting MDC kaba la ioh ban khur tang 9960 vote.
Ha Mawhati Constituency u kyrtong ka VPP u Bah Kynjohlang Rangtong u la ioh ban khur haduh 11592 vote bad tam haduh 1053 vote ïa u Bah Joplin Sten kyrtong ka NPP u ba la ioh tang 10539 vote.
Ha Umroi Constituency u kyrtong ka VPP u Bah Isynei Hinge u la ioh haduh 9937 Vote bad tam haduh 2008 vote Ïa u bah Rangkynsai Kharbuki kyrtong ka NPP ba dei ruh u sitting MDC u ba la ioh tang 7929 vote.
Lyngba ka jingjop jong ka VPP bd NPP ha Ri-Bhoi District, ka seng Congress, UDP, BJP kila jah kyrteng syndon hadien ba kim lah ban sei wat tang u wei ruh u MDC.