Hadien ba la shah jied kum u MDC/MLA ngan trei khambha shuh shuh, ong u Bah Synshar

Shillong, Rymphang 24: U MLA ka United Democratic Party (UDP) na Sohïong u Bah Synshar Roy Kupar Lyngdoh u la shah jied kum u MDC na Nongspung-Sohïong bad u la pynthikna ban trei na ka bynta ka roi ka par jong ka constituency. “Kane ka result ka dei kaba nga la khmih lynti. Namar mynta ba la dei u MLA bad u MDC, ngan dang trei shitom shuh shuh na ka bynta ka roi ka par ki paidbah bad ka constituency baroh kawei,” ong u Bah Lyngdoh haba kren sha ki lad pathai khubor.
Halor ka jingïoh jingjop kaba bun tam jong ka VPP ha KHADC, u la ong, “Ngi burom ïa kaei kaba ki paidbah ki la ai ka jingkyrshan.” “Ngin sa rai bad ka jingrai ka party kan long kaba khatduh,” u la ong haba jubab ïa ka jingkylli la ka UDP kan kyrshan ne em ïa ka EC ba la ïalam da ka VPP ha KHADC.