Shillong, Rymphang 27: Ki ar tylli ki kol ba la thep da u Gobindash Singh ka la ïarap ïa ka Nangkiew Irat SC ban pynjemkhnap ïa ka Nongrim Hills SC da 4-0 kol ha ka jingïalehkai jong ka OC Blue Shillong Premier League 2024 ba la long ha madan First Ground, SSA Stadium, Polo, ha ka sngi Palei.
Hadien ka jingïalehkai kaba pyrkhing bha ha ka kylla step da baroh arliang mamla, u Gobindash (46’, 72’) u la thep kol hapoh ka minit ba nyngkong jong ka kylla miet bad pynbud sa kawei pat hadien. Ki ar tylli pat ki kol la thep da u Jefferson Pakyntein (79’) bad u Wallamsuk Nongkhlaw (90’+3).
Kane ka resol kam shym la wanrah jingkylla ei ei ïa ka miej ïakheiñ poiñ, watla ka pynkiew poiñ ïa ka Nangkiew Irat shadien ïa ka Laitkor SC kaba don ha ka kyrdan ba san. Katba ka Nongrim Hills pat ka dang sah ha ka kyrdan kaba phra.
U Gobin, u bym shym la ïoh pynkhihjar shuwa kane ka jingïalehkai, u la trei shitom bha ha baroh kawei ka jingïalehkai bad u la ïoh ban thep kol hadien ba u la mareh stet sha ka liang kadiang bad pyrshang pashat ïa ka bol hapoh phyllaw kol, bad ka long kaba donbok namar ba u rangap kol jong ka Nongrim Hills, u Kitboklang Marbaniang u khlem shym la lah ban phikir bha ïa ka jinglong jingman jong ka bol kaba la rung beit beit sha kol.
Related Posts
Ka kol kaba ar kam shym la donkam kano kano ka bok, ha kaba u Gobin u la lah ban pyllait lyngba uwei u rangapdien hadien nangta sa ïa u Kitboklang (rangap kol ka liang pyrshah) ban thep suk ïa ka kol.
Hadien katto katne minit u Jefferson u la sei madan katto katne ki sap kiba tbit jong u ban pynliem ym ïa uwei hynrei arngut ki rangïalehkai ba shadien bad nangta un sa thep pat ïa ka bol. Nangta u rangïalehkai ba moh bujli u Wallamsuk u la pynthikna ïa kiei kiei ha ka khyllipmat shuwa ban kut ka por da kaba pynkhih ïa ka kol kaba khatduh.
Kane ka jingjop ka long kum ka kput ïa ka jingshah rem da 5-2 kaba ka Nongrim Hills ka la pynliem ïa ka Nangkiew Irat ha ka jingïalehkai ba nyngkong ha ka 09 tarik u Nohprah.
Ka jingïalehkai mynta ka sngi ka Shillong Lajong FC kaba wan ba-ar kan ïakhun pyrshah ïa ka Langsning FC kaba wan ha ka kyrdan kaba saw ha ka por 3 baje janmiet. Kine ki arliang mamla ki la ïakynduh ha ka sngi ba ar jong ka OC Blue SPL 2024 bad ka Lajong ka la jop ïa katei ka jingïakhun ha ka wat nyngkong da 4-0 kol.