Jowai, Jymmang 22: U Dr. Helpme Hamkhein Mohrmen ula pynbna ban ïakhun ïa ka Election MLA 2023 na ka 2-Jowai Constituency ha kane ka kynti bad ïa kane ula pyntip haba ïakren bad u Mawphor hadien ka prokram ba la pyllait paidbah ïa ka kot jong u kaba la ai kyrteng ka “Ki kjat jingshai ka Mynnor”.
U ma Mohrmen ula ong ka jingthmu jong u ban rung sha ka jylli jong ka kam saiñ hima sima ka long hadien ka jingsahkri kaba 32 snem kaba u la synñiang ïa ka Balang Unitarian Jowai, da ka jingïasngewthuh jingmut lang ula pan ka jingkyrkhu na ka Balang ban ïaid noh shakhmat ïa katei ka kam ban ïakhun Election ha u snem 2023.
Ula ong ‘kum u briew ba ju shakri ïa U Blei kane ka jingïakhun kam dei ba u kwah spah hynrei u kwah ban wanrah ïa ka jingkylla bad ka roi ka par ha baroh ki liang’, Shuh shuh ula pynsngew ba kam shong eh ha ka spah ban jop election hynrei ka dei ka jingstad jong ki paidbah ka Jowai Constituency kin shim ïaka rai.
Na ka liang u Dr Mohrmen ula dep ban pynkhreh ïa ka Mission, Vision bad ka Blue Print (Development of Jowai Constituency) bad u dang ap sa tang ka por ban pyllait ïa ka bad ïa kane la leh lang bad ki riew shemphang kiba don ha ki tnad sorkar bad kumjuh kiba nabar na ka bynta ban wanrah ïa ka jingbha jingmiat ïaka Jowai Constituency.
Kane ka jingpynkhreh jong u Dr, Mohrnem ban ïakhun kum u MLA ula pyntip u don shisha ïa ka thong ban shakri ïa ki paidbah da kaba ïaid katkum katei ka ‘Blue Print’ kaba kynthup lang ka jingai jingmut naduh ki nongïalam shnong, ki nongïalam ñiam, ki riew rangbah (senior), ki seng samla bad ki khynnad skul ban wan rah shisha ïa ka jingkylla bad ka roi ka par hapoh ka Constituency.
U Dr. H.H. Mohrmen u dei u khun jong u (L) Hamkhein Pariat bad ka kong (L) Ïaineh Mohrmen, mynta u shong u sah ha Riatsasim, Jowai. ryngkat ka lok jong u ka kong Neinihiwot Passah lem bad ki lai ngut ki khun.
Kumban shu phai khyndiat shaphang u Dr. H.H. Mohrmen ula long uwei na ki nongthoh ha ki kot khubor Khasi bad Phareng hapoh ka jylla, u nongthoh Article ha ki kot khubor, uba la ju trei rum kum u nonghikai haka Unitarin Upper Primary School kaba don haka shnong Puriang East Khasi Hills District, ula ju hikai ruh haka skul H.K. Singh Memorial Secondary School, Jowai.
Ula pyndep ïa ka skul na Governement Boys Higher Secondary School Jowai bad ïa ka BA na ka Kiang Nangbah Government College Jowai, ula pule skul ñiam ruh ha ka Unitarian College Manchester, kaba don ha ka nongbah Manchester, UK. Ïa ka MA ula pyndep na ka Madras University, Chennai bad u dei ruh uba la pyndep ïa kyrdan PhD na ka Martin Luther Christian, College Shillong.
U dei ruh u riew ieit mariang uba la thoh bad ïaleh pyrshah ïaka jingpynjot ïa ka mariang ha ki thaiñ Nongkhlieh, Narpuh, Nongtalang, bad kiwei kiwei de ki jaka, ula ju ïashim bynta ruh ha kaba ai jingkren ha ki College kum ka St. Edmunds College, St. Mary’s College, Synod College, Lady Kean College Shillong, Tezpur University, Tezpur, Assam bad ula ju ai jingkren ruh ha ka Centre for Policy Research, New Delhi, kumjuh ruh ha ka Tere madre for Policy research, New Delhi kumjuh ruh ha ka Tere Madre ha Turin, Italy.
Ha ka juh ka por u dei ruh u riew treimon sngewbha uba la don bynta ha kiba bun ki seng treimon sngewbha, ula ju long u Vice President ka Kiang Nangbah Governement College, ula ju don bynta ruh ha ka Jaiñtia Student Union bad u Asst. General Secretary ka Khasi Jaiñtia Student Union.
Ula don bynta ha kaba seng ïa ki Liberal Youth and Cultural Adventure Association kaba hadien la tip kum ka Society for Urban Rural Empowerment bad ula long u nongïalam jong ka seng, ula long ruh u Chairman ka North East Slow Food and Agrobiodiversity Society Shillong.
