Dawa ka FKJGP ban ‘Blacklist’ ïa ka kompani ba tei ïa Ïingdorbar Thaw Aiñ
Shano jah ki Engineer ka PWD ba khmih ïa ka kam
Shillong, Jymmang 22: Ka Federation of Khasi Jaiñtia & Garo People (FKJGP) hynne ka sngi U Blei kala dawa ïa ka Sorkar Jylla ba ka dei ban ai dak iong (Blacl List) noh ïa ka kompani kaba pyntrei ïa ka Ïingdorbar Thaw Aiñ ba thymmai ka Jylla (Meghalaya Legislative Assembly) ha Mawdiangdiang namar ka jingtwa jong ka jingtei.
Ka Ïingdorbar Thaw Aiñ ba thymmai ka Jylla Meghalaya ka dei kaba la pyntrei da ka kompani Rajkiya Nirman Nigam Limited, kaba dei ka Public Sector Undertaking (PSU) jong ka Jylla Uttar Pradesh ha ka jinglut jingsep kaba kot haduh T. 127 klur.
Ka FKJGP kala buh ïa kane ka jingdawa halor ka jingtwa kynsan ha ki katto katne ki bynta jong ka jingtei kaba la jia hynne ka step Sngi U Blei bad buh jingkylli ruh ba ‘Mano ban shano kita ki site engineer jong ka Tnad PWD ki don haba la bynshet ha ki ïa ka kam ban khmih ïa ka jingtrei bha ïa ka kam”.
U Working President ka FKJGP Bah Dundee C Khongsit ula pyntip ba kat kum ka jingtip bala ïohlum da ka seng, ka Sorkar Jylla kala pynkhreh ïa ka jingmang tyngka ba kot haduh T. 145 klur ban tei ïa kane ka Ïingdorbar Thaw Aiñ ba thymmai ka Jylla hynrei kane ka Kompani na Uttar Pradesh kala ohdor ban pyndep tang hapoh T. 127 klur kaba duna haduh T. 18 klur.
“Ka Seng kam kwah ban tuklar ïa kata ka jingbuh dor ba rit jong ka kompani lada ka jingmyntoi ka long ïa ka Sorkar Jylla hynrei ym dei pat ban ïapeiñ ïa ka jingbha jong ka kam” ula ong.
U Bah Dundee ula pynpaw ruh ba ka seng ka don ka jingsuba ba kane baroh ka wan jia namar ba katei ka Kompani kaba na bar jylla ka ïoh ban leh khun khatduh (favouritism) na ki ba bat ïa u lakam jong ka pla tyngka ha Secretariat & Meghalaya Legislative Assembly kaba la ailad ïa ka Rajkiya Nirman Nigam Ltd ban iuhrot bad bad leh katba ka mon ïa ka kam.
Ka FKJGP ka sngew ba lada ki 60 ngut ki nongmihkhmat bala pynkup bor ban leit thaw ain ha Meghalaya Legislative Assembly ki nud ban buh jingma wat ïa kata ka Ing Dorbar Thawain tang namar ka tyngka pliah shano kan ïalam ïaka lawei jong ka jylla hi baroh kawei.
“Na ka liang jong ka FKJGP Sengkmie kan sa shim da kiwei pat ki sienjam wat lada haduh ban poi sha u pud ban phah tuklar haka Comptroller and Auditor General of India (CAG) namar ba baroh ki Audit reports jong ki Public Sector Undertaking (PSU) la khmih lyngba jong ka CAG” ula ong.
“Ngi dawa jur ïa ka Sorkar ban ai dak iong noh ïa ka Rajkiya Nirman Nigam Ltd bad ha kajuh ka por ngi maham jur ïaka sorkar jylla ba nangne shakhmat kam dei ban shu ailad than tang ïa ki kompani kiba nabar jylla khlem da bishar bniah” ula ong.