Shillong, Jymmang, 22: Rynglang bad ka pyrthei baroh kawei ka Jylla Meghalaya ha ka sngi Thohdieng ka la rakhe ïa ka sngi ban sumar ïa ki ngap ne ka World Bee Day halor ka phang “Promote Bee Keeping: Augment Farmers’ Income and to ensure Sustainability of Life”.
Ïa kane ka jingrakhe la pynlong da ka Directorate of Horticulture, ka Sorkar Meghalaya ha All Saints’ Hall, Shillong ha kaba u Secretary jong ka Department of Agriculture & Farmers Welfare u SC Sadhu u la long kum u Kongsan.
Haba kren kum u Kongsan, u S.C Sandhu, u la banjur halor ka jingdonkam ban sumar ïa ki Ngap.
U la ong ba na ki 17 tylli ki Sustainable Development Goals, 15 tylli ki jingjop ki dei na ki Ngap.
U la banjur ba dei ban sumar ïa ka mariang khnang ba ki ngap kin roi kin im bad kin ai jingmyntoi ïa u khun bynriew.
Shuh shuh u la ong ki nongri Ngap ki dei ban bud nuksa na ki nongri ngap na kiwei pat ki ri khnang ban kyntiew ïa ka ïoh ka kot ha ka kam ri ngap.
“Ban kham kiew ka dor, donkam ban long kiba tbit naduh kaba song ïa ka ngap, ban phah test, bad ba ka ngap ka dei ban long kaba paka kaba la pynmih na kane ka jylla” u la ong.
Shuh shuh u la ong ba ka jingpynïaid iew ka long kaba donkam bha la ka long hapoh ka jylla lane ban ïarap ïa ki nongri ngap ba kin pynpoi ïa ka ngap sha ki nongthied khamtam haba jur ka jingdawa.
Haba pyntip ba ka donkam ruh ka jingkyrshan jong ka Sorkar, u la ong ba 75 ki pung hapoh ka jylla yn sa buh ha manla kawei pa kawei ka district lyngba ka Amrit Sarovar Mission kaba thmu na ka bynta ban pynneh pynsah ïa ka um na ka bynta ki pateng ki ban sa wan.
Ïa kane ka mishon la pynbna paidbah kum shi bynta ka jingrakhe ïa ka Azadi ka Amrit Mahotsav.
Hadien ka jingïalang, la pyni paidbah ïa ka ngap ba la wanrah na ki District bapher bapher bad ba la die paidbah ha kane ka sngi.
La pynlong ruh ïa ka jingïathir ïatai halor ka kam ri ngap bad ki jingmyntoi jong ki nong ri ngap ha kane ka jylla Meghalaya ha kaba la ïashim bynta da ki nongri ngap bad ki nongseng kam.
