Shillong, Jymmang 20 : U Myntri Rangbah ka jylla u Conrad K Sangma ula kren shai ha ka Sngi Thohdieng ba ka sorkar kan ym pynduh ne pyndam ïa ka aiñ ïakhalai ne ka Meghalaya Regulation of Gaming Act 2021 namar lada pyndam ka sorkar jylla kan duh nong kumba 8-10 klur ka khajna.
Haba kren sha ki lad pathai khubor u Mytnri Rangbah lyngba kane ka aiñ yn teh lakam ïaki jaka pynïakhalai ha ka jylla namar kane ka aiñ ka la don lypa ha ka jylla mynta la 25 snem. “ Lada ngi pynduh pyndam ïa kane ka aiñ ka jingduh nong jongka jylla kan long kumba 8-10 klu tyngka” ong u myntri rangbah kum ka jingpynshai sha kito kiba pyrshah ïa kane ka aiñ.
U la pynshai ruh ba kam don kano kano ka jingthmu ban pynmih ïaki Casino ha kane ka nongbah ne hajan kino kino ki nongbah ba heh ka jylla.
“ Ngi kren shai ïa kane namar ki don da kiwei ki lad ki lynti ban pynmih khajna ïa ka jylla. Na kata ka daw ngim kwah ba kin mih ki Casino ha kane ka nongbah ne ha kino kino ki jaka marjan ki nongbah ba heh ka jylla khnang ba ki khun samla ruh kin lait na ki jingpynshoi. Nalor kane nga pynthikna ruh ba ki trai shnong kin ym lah ban ïa shim bynta” ong u myntri rangbah.
U la ong ba ka orkar ka kloi ban ïakren sngewthuh sani bha halor kane ka aiñ bad kito baroh kiba don ka jingsngewkhia ne sngewpyrshah jur namar ka kam ïa khalai ka dei kaba la don lypa ha ka jylla bad ka dei ruh kaba pdiang bad mynjur da ka imlang ka sahlang.
“ Ngan kren shai ïa phi ngi donkam ïa ka khajna namar ka jylla ka don hapdeng ka jingduna pisa lypa namar kat haduh mynta la shu shaniah beit tang kaba ïoh na ka sorkar pdeng. Na kata ka daw ngi ïa kynduh ïa kiba bun ki jingeh namar lada phai sha ka kam tih marpoh khyndew ruh kakhajna ka la hiar bha bad kiwei kiwei ki kam ruh ki la nang stait nangstait bad kumta ka sorkar ka donkam pisa ban pynïaid ïaki kam shakhmat” ong u myntri rangbah.
