Shillong, Jymmang 2 2: U Myntri Rangbah ka jylla u Conrad K Sangma lem bad u myntri ka tnad pule puthi u ma Lahkmen Rymbui mynta ka sngi ki la ïoh ban ïakren bad u Myntri ka tnad Education, Skill Development and Entrepreneurship u Dharmendra Pradhan hadien ba la wai ka Convocation ba XXVII jongka NEHU na ka bynta ban pyllait kloi noh ïa ka tulop ki nonghikai SSA khnang ba ka sorkar ruh kan ïoh ban siew ïa ki ha ka por kaba biang.
Na ka liang u Dharmendra Pradhan u la kular ban shim khia halor kane ka kam khnang ba ki nonghikai SSA bad ki nongtrei Midday Meal kin ym ïa kynduh jingeh nangne shakhmat.
Haba ïakren bad ki lad pathai khubor u Pradhan u la ïathuh ba u myntri rangbah bad u myntri ka tnad pule puthi ki la wanrah hakhmat jongu ïa kane ka jingeh ba ka sorkar jylla ka ïa kynduh ha kaba ïadei bad ka tulop ki nonghikai SSA. “ Ngin thaw lad ban shim khia ïa kane ka kam namar ka sorkar pdeng bad ka sorkar jylla ki don ka jingkitkhlieh na ka bynta ki 15 lak ngut ki khynnah skul.
Lah ban pynkynmaw na ka liang u Myntri Rangbah ka jylla naduh ka Sngi Thohdieng ula ïathuh ha ki lad pathai khubor ba un shimkhia ban rah ïa kane ka mat hakhmat u Myntri ka sorkar pdeng uba dei peit ïaka pule puthi u Dharmendra Pradhan ha ka jingwan jongu sha kane ka jylla na ka bynta ka Convocation ha NEHU mynta ka sngi. U Myntri Rangbah u la pynpaw ba ka daw ba ka sorkar kam lah ban pyllait ïa ka tulop ki nonghikai SSA ha ka por ka dei namar ka jingslem ban pyllait naduh Delhi hi.
Namar na ka tulop ba dei ban siew sha ki nonghikai SSA 80 % ka wan ka sorkar pdeng bad 20 % na ka sorkar ylla. Kumta lada ka sorkar pdeng ka slem ban pyllait ïa ka tulop ka sorkar jylla ruh ka mad jingeh bha. Ka sorkar ruh ka sngewkhia ïa ki jigeh ba ki nonghikai ki ïakynduh bad dei na kata ka daw ka ïai ïakren bad ïai pynkynmaw ïa kane ka kam bad ka sorkar pdeng na ka por shaka por.
U la ong lada phai sha ki skul sorkar ne ki college sorkar ne kiba ïoh jingkyrshan na ka sorkar kam ju don jingeh satia ha ka tulop namar ka sorkar ka la dep mang lypa ïa ka pisa haduh 14,000 klur tyngka man la u snem ban siew tulop hynrei ka jingeh ka dei tang ïaki nonghikai SSA namar ka tulop jongki ka wan na Delhi.
