Ka BJP Meghalaya ka dei ban pyntikna ïa ka ILP bad Ktien Khasi ruh

shillong, Jymmang 22 : Da kaba ïaroh ïa ka sienjam ba lashim da ka BJP Meghalaya ban buddien ïa ka jingpyntrei ïa ki skim jong ka sorkar pdeng ha ka jylla, na ka liang u MLA ka Mawlai, Bah Process T Sawkmie u la ong ba kadei ruh ka kamram jong ki ban buddien lang wat ïa kiwei ki ishu kiba ktah ïa ka jylla kynthup naduh ïa ka Inner Line Permit bad ruh ïa ka Ktien Khasi, Garo ban ïoh pynrung noh ha ka Khyrnit kaba Phra.
“Ka jingkwah jongnga ka long ba kim dei satia ban kitkhia tang ïa ki skim jong ka sorkar pdeng ba ïoh ka Meghalaya, hynrei kadei ban buddien ruh ïa ka ILP namar kane ka ishu kadei kaba khia bha. Ka long kaei kaei kaba sngewsih ba katei ka jingdawa haduh mynta kam pat urlong.
Ngi kwah ruh ba kumba ki don ïa kata ka Central Monitoring Committee ban peit ïa ki skim ka sorkar pdeng, kumta ngi kwah mynta ba kin thaw sa ïa ka State Monitoring Committee ban buddien sa ïa ka ILP namar kane ka ishu kadei kaba donkam haduh katta katta. Kane kan pyni ruh ba ka BJP Meghalaya ka shimkhia ym tang ïa ki skim ka sorkar pdeng hynrei khamtam ïa ka ILP ,” u la ong haba kren bad u Mawphor.
Kawei ka mat kaba utei u MLA u dawa ba ka Meghalaya BJP kan buddien lang ka dei ruh ban pynsngew bad pynurlong halor ka jingpynrung ïa ka Ktien Khasi ha ka Khyrnit kaba Phra jong ka Riti Synshar jong ka Ri. U Bah Process u ong ruh ba katkum ka jingpynpaw da ka Khasi Author’s Society kadei ka jingdawa ka la ïaid la bun bun snem bha khlem pat poi shaei shaei ruh.
Da kaba banjur ba ka long kaba donkam ïa baroh ki MP jong ka Jylla ba kin buddien biang ïa katei ka bynta, u Bah Process u la ong, “Ka sorkar ba mynshwa lei kim shym la buddien ne kitkhia ban ïoh pynrung noh ïa ka Ktien Khasi bad Garo ha ka Khyrnit ba Phra lane ban syllok bad ki MP jong ka jylla ban ïa buddien lang.”
Katkum ka jingong jong u, katei ka ishu mynta ka shu kut beit tang ha ki Department bapher bapher lane tang ha ki press conference khlem pat poi shaei shaei katba ha Delhi kam poi bad ym don ba tip ïa ka.
Shuh shuh u la ong, “Ki samla jongngi kin ïoh ban thoh noh ha ka Ktien Khasi ha ki eksam kam bapher bapher lada la ithuh noh ïa ka Ktien Khasi ne Garo ha ka Khyrnit kaba Phra. Hynrei kumba long mynta ha ki bynta bapher bapher, kiwei ki ïoh ban thoh ha ka ktien lajong hynrei ngi, ngim ïoh namar ba ym pat ithuh ïa ka.”
Shuh shuh utei u MLA ka Mawlai, u la kyntu ïa ka BJP Meghalaya ba kadei ban buddien lang ruh ïa ka Meghalaya Residents Safety and Security Act, kaba u Lat u phah mynta sha ka Home Ministry.
U Bah Process u ong ruh ba ka Meghalaya BJP ka don ruh ka bynta kaba khraw ban ïa kren bad ka sorkar pdeng na ka bynta ban wanrah ïa ki projek kiba heh ban weng ïa ka jingkhapngiah khamtam kum ka dheng kali da kaba wanrah noh da ki lynti suiñ ne fly-over kumjuh ruh da kaba shna ïa ki lynti ïaid napoh ñiamra ne lynti krem.
“Ban shna ïa ki fly over kylleng kylleng ban weng ïa ka dheng kali, donkam da ki hajar klur kumta donkam ïa ka Meghalaya BJP ban ai jingmut sha ka sorkar pdeng halor kitei ki jingdonkam. Namar lada ym don ka jingkyrshan na ka sorkar pdeng da lei lei ruh kan eh bha,” bynrap biang utei u MLA.
U ong ruh ba da ka jingshimkhia lang jong ki, kan ïarap ïa ka jingkiew jong ka jylla namar kin don lang ka jingkitkhlieh ym tang ban peit ïa ki projek ba la don lypa hynrei wat ban wanrah da ki projek ba thymmai kiba ka jylla k adonkam shisha.