Jowai K’Lyngkot 06: U bah Pynshngaiñ N. Syiem uba dei u Working President jong ka Meghalaya Pradesh Congress Committee (MPCC) haba kren ha ka jingïalang paidbah jong u ma Nehemayah Tyngkan ha shnong Iooksi West Jaiñtia ula ong kam don jingeh ïa ka party Congress ha kane ka kynti ban thaw ïa ka sorkar ka ban ai jingshakri kaba bha tam ïa ki paidbah nongshong shnong ka Jylla.
Shuh shuh ula pynsngew kum u kyrton ban aireng ha kane ka elekshon MLA 2023 na Pynthorumkhrah pyrshah ïa u bah AL Hek bad u kyrmen skhem ba un wan ha ka jingjop na ka bynta kane ka samoi Election 2023.
U bah Pynshngaiñ ula kren pynthikna ba ka Congress kan sa jop na Mawhati, Mylliem, Mawkyrwat, Pynthor-umkhrah, na Mowkaiaw bad na kiba bun kiwei de ki Constituency. U la ong ba don kiba ong ba ka Congress kam lah shuh ban thaw Sorkar namar kam don briew shuh, hynrei ula pynkynmaw ba kumno u (L) Dr. F.A. Khonglam wat la u long marwei kum u Independent Candidate u dang lah ban long u Chief Minister ka sorkar Jylla, kumta kam long kaba eh ïa ka Congress ruh ban thaw sorkar ha kane ka kynti ban wan.
U bah Pynshngaiñ ula khot la wer ïa ki paid nongshong shnong jong ka thaiñ 13 Shnong ba kin nang ban jied ïa kita ki Kiang Nangbah bad ki Tirot Sing jong ka juk mynta khnang ba kin lah ban ïalam ïa ka Ri bad ka jaid bynriew. U Khot ïa ka jingkyrshan jong ki nongshong shnong ïa u ma Nehimaya Tyngkan uwei na ki samla rangbah ba dang khlaiñ ki bor jingmut jingpyrkhat bad ruh uwei na ki trai shnong uba tip bha ïa ka eh ka shon jong ki nongshong shnong khamtam kito ki shnong kiba hap ha ki bynta khappud bad ka Jylla Assam kiba la mat iï shibun ki jingeh kiba har rukom.
U ong ba kum ki nongshong shnong ki dei ban jied ïa ki nongmihkhmat kiba skhem ka jingmut jingpyrkhat, kiba nud, kiba tip bad shemphang, kiba ieit ïa ka kynja bad ki bym ieit sbai.
U bah Syiem ula pynkynmaw ba ki sorkar kiba la dep kila pynmih shibun ki aiñ ki kanun kiba ktah haduh katta katta ïa ka Ri bad Jaitbynriew Khasi-Pnar. Naduh ka jingpyrshang ban pynrung ïa ka CAA, ka jingbyn ailad shuh ban tih ïa ki marpoh khyndew napoh ka ri lajong bad bunsien kine ki aiñ kila teh mraw pynban ïa ki nongshong shnong jong ka Jylla ula ong shuh shuh.
Ha kane ka sngi u ma Nehemayah Tyngkan ula ïoh ban pynrung dkhot shapoh ka Congress ïa ki 75 ngut kiba dei ruh ki nongkyrshan jong ka UDP na ki thaiñ Barato bad Sahsniang.
