Yn deng lama ïong ka MPWU ban pyrshah ïa ka jingthmu pynïaid ki riewshimet ïa ka tnat bording

Shillong, Jylliew 27: Ka Meghalaya Power Workers’ Union (MPWU) da kawei ka sur ki la rai ban pynpaw ka jingïadonlang bad ai ka jingkyrshan pyrshah ïa ka jingthmu ban phah pynïaid da ki riew shimet ïa ka tnat bording (electricity sector) da kaba deng ïa ki lama ïong ha ka 9 tarik u Naitung, 2025, ha ki kynta treikam.
Ïa kane ka rai la shim ha ka jingïalang kaba la long ha ka 20 tarik mynta u bnai, ha Shillong.
Ha ka kyrwoh u General Secretary ka MPWU, K.B Chyne, u la ong ba ka MPWU ka ïeng lang kawei bad kito kiba pyrshah ban pynlong noh ïa ka tnat bording kum ka jaka trei ban pynïaid ki riew shimet ha India, ha kaba ka jingshakri ba kongsan kum ka tnat bording dei ban buh shwa hakhmat na ka bynta ka bha ka miat bad ka roi ka par nalor ka jingïoh myntoi.
Ka union ka la dawa ïa ka sorkar ba kan sangeh ïa ka jingpynlong kam shimet ïa kane ka tnat, hynrei ban kyntiew ïa ka jingtreikam kaba khuid bad ban ïada ïa ka hok ki nong pyndonkam bording, u la bynrap.
Katkum ka jingong jong u, kane ka rai ka long ruh kum ka jingkyrshan jong ka National Coordination Committee of Electricity Employees & Engineers bad ïa ki 17-point Charter of Demands ba la thaw da ki Central Trade Union.
Ha ka jingïalang ka union ka la khmih bniah ruh ïa ka jingpynbna ba la pynmih da ka sorkar Meghalaya ha ka 7 tarik u bnai Jymmang, 2025, kaba khang ruh ban pynlong ki jingïakhih ïa ki kam kiba kongsan kiba ïadei bad ka electricity.
Ka union ka la ïaroh ruh ïa ka kam ban ïada ia ki jingai jingshakri kiba kongsan, khamtam ha ka tnat electricity, bad pynpaw ka jingkyrmen ba ka sorkar kam dei ban ïapeiñ bad ki briew ba kwah ban pynïaid shimet haba ïadei bad ka electricity sector.
Ka MPWU ka la banjur da kaba ong ba ka kam bording kadei ka bynta kaba kongsan ha kane ka jingim kaba mynta bad ka jingbym don jong ka, kan ktah ïa ka jingim bad kan ktah ïa ka jingkiew bad ïaid shaphrang ka longbriew manbriew.
“Hadien ba la pyrkhat halor kane ka jinglong kaba dang ïaid mynta bad ka jingpyrkhat ban phah pynlong noh ïa ka tnat bording ban pynïaid da ki riew shimet, ka MPWU ka la rai ban pynpaw ïa ka jingïadonlang bad ban pyrshah pat ïa kane ka jingthmu da kaba pynlong ïa ki lama ïong ha ka 9 tarik u Naitung mynta u snem ha ki por ba longtrei,” ïathuh u Bah Chyne.
“Da kaba ïatreilang ngin lah ban tei ïa ka jingtreikam kaba bha bad ban pynneh pynsah ïa ka kam bording sha ka lawei na ka bynta ka ri India,” u la bynrap.