Shillong, Rymphang 4 : U Symbud Myntri Rangbah ka jylla uba khmih ïa ka tnat Pynroi Sor Bah Sniawbhalang Dhar ym tang ba u ju leit buddien na ka por sha ka por ïa ki projek pynroi Sor ha kane ka nongbah Shillong bad New Shillong kum ki projek Smart City hynrei u la hiar ban leit buddien ruh ïa ka jingpyntreikam ïa ki skhim bad projek sha ka Constituency lajong.
Ha ka Sngi Saitjain jong ka taiew baladep u Bah Dhar u la pynlut por ban leit peit ïa ka jingpyntreikam ïa ki projek bad ïa ka skhim hapoh ka Nartiang Constituency da kaba leit jurip ha ka shnong Mynsngat ïa ka jingshna ïa ka madan phutbol, ka surok bad ïa ka Iingdorbar.
Ha kane ka jingleit jurip la synran lang da u SDO.
U la pynpaw ïa ka jingsngewkmen ba ka kam ka la ïaid shakhmat bad u pynpaw ruh ba u kwah ban pyndep ïa kine ki jingtrei hapoh ka por ba la buh.
Lah ban pynkynmaw na ka por sha ka por u Bah Sniawbha kum u MLA bad kum u Dy. CM u don ka jingthrang ban pynlong ïa ka Nartiang Constituency kum ka Model Constituency bad kawei na ki nuksa ba u la pynpaw dang shen ka dei ka jingplie ïa ka Stadium kaba long katkum ka International Standard kumba la pynbna da u Myntri Rangbah u Conrad K Sangma ha ka sngi ba plie ïa kane ka Stadium ha Wahïajer.
Kane ka dei ka Stadium ba nyngkong eh kaba biang lut nadong shadong ym tang hapoh rilum Jaintia hynrei wat ha jylla Meghalaya ruh.
Hadien ka jingleit jurip ïa ki skhim bad ïa ki projek u la leit ban ïadon ryngkat ha ka jingïalang kur jong ka kur Pale ha ka shnong Moodop da ka jingsynran jong u CEM ka JHADC Bah Thombor Shiwat.
