Shillong, Rymphang 05 : Ka skul Government LP School Pomkaniew dei kawei na ki skul kaba la rim tam ha ka thaiñ Mylliem hynrei ka kylla long ruh ka skul kaba la shah iehbeiñ tam na baroh ki skul. Ïa kane ka skul la seng naduh ka snem 1965 kata ha shwa ba ka Meghalaya kan ïoh la jong ka jylla ba pura.
Kane ka skul kaba la ïaid mynta sha ka 58 snem ka jingshakri ïa ka thaiñ baroh shi katta ka ai ka jingshakri ha ïingskul kaba la rim bha bad teng teng haba jur slap ka buh jingeh bha ym tang ïa ki khnnah hynrei wat ïa ki nonghikai.
Katkum ka jingïathuh da i Headmistres, Kong Lucydora Syiemlieh la ong ba na kylleng ki shnong ki wan pule ha katei ka skul bad mynta leilei ki la poi shaduh 240 ngut tam ki khynnah.
“Ha ka snem ba la dep namar ka jingkhapngiah palat ngi la hap ban pynshong haduh 8 ngut ki khynnah ha kawei ka ben. Bapli ha ka jingkhapngiah ki shem jingeh wat ban thoh ban pule. Bad kane ka la long shisha ka thma ïangi ki nonghikai,” ong i Headmistress.
I la ïathuh ba hapdeng kitei jingeh i la kyrpad ïa ka tnad pule puthi hynrei kane ka ïai sah bad kumta ki la hap ban bteng ban pynlong skul ha ka ïingskul kaba rim. “Ha ka por slap lei lei da poi ha skul la jhieh lut ki ben bad ki kot ki sla,” i la bynrap shuh shuh.
Hynrei i ong ba dei tad lyngba u Bah Hamlet Dohling kum u MLA bad Myntri Sorkar ka Jylla ba ki la ïoh ïa ka jingkular ban ïoh noh da ka ïingskul ba thymmai kaba la urlong bad ïoh ban plie ha kane ka sngi Nyngkong.
Kumta, i la ong ba ka jingpynïoh jong u MLA barim da ka ïingskul kaba thymmai kaba la shna da ka dewbilat kala pynkmen haduh katta katta ym tang ïa ki nonghikai hynrei khamtam eh ïaki khynnah skul bad ïa ki kmie ki kpa.
Ïa kane ka ïing skul la plie paidbah da u Bah Hamletson, Chief Adviser jong u Myntri rangbah ha kane ka sngi Nyngkong ha ryngkat ka jingdonlang ki nongïalam shnong, ki ophisar na ka tnad pule puthi bad ki kmie ki kpa.
Na ka liang ka shnong ruh ki la pynpaw ka jingsngewnguh ïa u MLA barim uba la ïohi bad pynsngew ïa ka jingud jingnam jong katei ka skul da kaba pynïoh ïa katei ka ïing skul.
“Ngi pynpaw ka jingsngewnguh kaba kyrpang ïa Bah Hamlet ba la pynïoh ïa kane ka ïing skul kaba thymmai ha ka shnong jongngi,” ong u Rangbah Shnong, Bah Kibarsing Kharkongor. Shuh shuh u la ïathuh ba la slem bha ki la pyrshang ban pynïoh jingïarap ïa katei ka ïing skul hynrei kam shym la urlong satia.
Na ka liang u Bah Hamlet haba kren ha ka jingïalang u la ïathuh ba kum u MLA ha kito ki snem u la lah ban pynrung haduh 7 tylli ki skul ban ïoh ïa ka ïing skul ba thymmai kynthup lang ïa ka ïing skul ha Pomkañiew.
Ua ong ruh ba katei ka shnong ka la ïoh bun bha ki kam pynroi ha ka por jong u kynthup naduh ka madan ïalehkai ba la shna ha ka dor ba 1 klur tam kumjuh ruh ïa ka surok kaba la shna thymmai ha ka jingmang ba 3 klur tam nalor kiwei kiwei.
“Wat hadien ba nga la rem ruh ngam shym la sangeh ban trei na bynta ki paidbah ka constituency namar nga kwah ban shakri. Bad ym don hi ruh kiba lah ban khang ïanga ban trei,” u la ong da kaba pyntip ba na bynta kiwei ki jingdonkam ha ka skul kumba la pynpaw da i Headmistress bad Rangbah Shnong un sa wad lad wad lynti.
