Shillong, Rymphang 05 : U Nongai Ktien ka sorkar jylla ba dei ruh u Myntri sorkar, Bah Paul Lyngdoh ha ka sngi Nyngkong u la kynthoh ïa ka Voice of the People Party (VPP) da kaba kynnoh ba ka pyrshang ban pynlong politik ïa ka ishu Meghalaya Lokayukta.
Haba kren bad ki lad pathai khubor, u Bah Paul u la ong, “Ban pynlong ishu politik da kaba ïalam bakla ïa ka jingsngew ki paidbah kadei kaei kaei kaba ngam sngew dei satia namar ka long kumba pyrshang ban kdat noh shawei ïa ki ishu kiba donkam kiba dei bad ka jylla.”
Dang shen ka VPP ka la sangeh noh ïa ka jingïakhih jong ki ban dawa thung kam biang ïa ki ophisar ba la shongthait ba la thung da ka Lokayukta. Katei ka party ba don ha ka Liang Pyrshah ka la kynnoh ruh ba ka jingweng kam ïa kitei ki ophisar ba la shongthait ka la wan ha ka por ba ka Lokayukta ka lap ba ka don ka jingsuba donkti bamsap jong uwei u MLA uba dei u bahaïing jong u Myntri Rangbah ka jylla.
U Bah Paul uba dei ruh ha kajuh ka por u Working President ka DUP u la ïathuh ruh ba ka Meghalaya Lokayukta Act ka la kren shai bha ba kim lah satia ban thung ïa ki ophisar ba la shongthait namar ka bor treikam jong ki la ka kham duna lada ïa nujor bad ki ophisar kiba dang don ha ka kam.
Nalorkata, u ong ruh ba kim lah satia ban ïaid lait na ka Act kaba la wan hadien shibun bha ki jingpyrshah ha kylleng ka Ri.
U ong ruh ba ka Myntri ba dei peit ïa ka tnad Aiñ, Kong Ampareen Lyngdoh ka la dep ban kynduh ia ki nongïalam ka VPP kiba kwah ban kynduh ïa u Myntri Rangbah ban ïakren halor kane ka ishu bad na ka liang u Myntri Rangbah u la dep pynpaw ba u long uba kloi ban kynduh ïa ki.
“Kane ka dorbar mangtyngka ban wan ruh ka plie ka lynti na bynta jong ki ban iakren ia kane ka ishu hynrei ngim lah pat ban ïa kren ïa kaei kaba ka Aiñ ka kdew,” u la bynrap biang.
Shuh shuh u la pynshai ba ka Lokayukta kam dei satïa ha ka jingpeit pura jong ka sorkar jylla namar ka thong hi ka long ba ka Lokayukta kan ai ka jingbishar kaba khlem shah liang bad ba kam dei hi ruh ka tnad sorkar.
“Kumta lada ngi leh pyrshah ïa ka Act, ka sorkar jylla kan shah kynnoh ba ka pynkheiñ ïa la ka jong ka aiñ. Ha kajuh ka por lada phi ong ba phi kwah ïa ka rukom treikam kaba khuid hynrei phi kwah pat ba ka sorkar kan pynkheiñ ïa ka Act, kumno ngni lah ban leh ïa kine ha kajuh ka por,” la bynrap biang u Myntri.
U Bah Paul ula ïathuh ruh ba na ka liang u Myntri Rangbah u la dep ban kren shai ba ka sorkar ka kloi ïa kino kino kiba kwah ban wan sha ka miej jong ka jingïakren namar kim don ei ei ban buhrieh.
