Shillong, Rymphang, 05: U Nongïalam ka Liang Pyrshah jong ka Ingdorbar Thawaiñ Bah Ronnie V. Lyngdoh, ha ha ka Lah Sngi u Blei u la ong ïaroh ïa ka jingthmu ban pyndonkam ïa ka National eVidhan Application (NeVA) ban pynlong ïa ki jingïatai jong ka Ingdorbar Thawaiñ kiba khlem sangeh bad ki bym donkam shuh ban pyndonkam ha ka kot.
U Bah Ronnie u la ïoh jinghikai mynta ka sngi halor ka jingpyndonkam ïa ka Application na ki ophisar jong ka IT Cell ka Secretariat ka Ingdorbar Thawaiñ ha ka Conference Hall jong ka Administrative Block ka Assembly ha Khyndailad, Shillong.
U la ïaroh ruh ïa u Lamphang jong ka Iingdorbar Thawaiñ u Thomas A. Sangma, ïa ki ophisar jong ka Assembly Secretariat kiba la pynsdang ban pyntreikam ïa ka National eVidhan Application.
U la kdew ruh ba ka jingpyndonkam ïa ka Application kan ym pynlehnohei ïa ka por namarba lah ban phah ïa ki jingkylli bad ki notis ha kano kano ka khyllipmat.
Lah ban kdew ba kane ka Application ka don ïa ka Secure Page na ka bynta uwei pa uwei u dkhot jong ka Ingdorbar na ka bynta ban phah ïa ki jingkylli bad kiwei kiwei ki notis.
Ka NeVA, ka don hapoh ka NIC Cloud MeghRaj, bad la shna kyrpang ban pynïaid ryntih ïa ka jingpynïaid ïa ka dorbar u Lamphang, bad ban pynïaid ïa ka Legislative Business khlem da pyndonkam shuh ïa ki kot ki sla bad ban ïarap ïa ki dkhot ka Ingdorbar ban pyndep ruh ïa la ka jong ka kamram hapoh ka Ingdorbar Thawaiñ.
