Ym sngew ïahap ka Myntri halor ka jingdawa nongbah Tlang ka ACHIK ha Tura

Shillong, Naitung 18: Ka Myntri bad Nongaiktien ka Sorkar Jylla kong Ampareen Lyngdoh ha ka sngi Ba-ar, ka la pynpaw ba ka jingdawa Winter Capital ne nongbah Tlang jong ka A’chik Conscious Holistically Integrated Krima (ACHIK) kaba dang shah jingit mynta ha Tura, ka dei ka bym sngew ïahap satia ban mynjur namar ka Nongbah hi ka dei ka Shillong.
“Ha nga shimet nga sngew ba ym dei ban sngap ïa kum kine ki jingdawa. Lada mih ki jingdawa wanrah ïa ka Winter Capital shatei, wanrah ia ka Spring Capital hangne, wanrah ia ka Summer Capital sha kiwei ki jaka, baroh kiei kiei kin sa ïaid bakla lut”
Ka ong ba ka Meghalaya ka dei ka Jylla kaba don ïa ki District bapher bapher, bad lada man ki District ki dawa ban ai ïa ngi kata, ai ïa ngi kata, kan long kaba eh ïa ka Sorkar ban pynïaid ïa ki kam ki jam.
Ka Kong Ampareen kala kdew ba ka jingpynkha jong ka Sorkar ïa ki C&RD Block ha kylleng ki jaka ka dei kawei na ki sienjam ban rah shajan ïa ka jingshakri ka Sorkar sha u paidbah.
Ka la pyntip ba u Myntri Rangbah un sa ïakynduh ïa ka ACHIK ha ka 24 tarik Naitung ha ka jingleit jong u sha Ri-lum Garo.