Shillong, Naitung 18 : Ka Myntri ka Koit ka Khiah Kong Ampareen Lyngdoh mynta ka sngi Ba-ar, ka la ïathuh ba ka sorkar jylla ka la thung da ka Committee ka ban khmih bad bishar bniah ïa ki dawai dashin ba la dier por shwa ban bret noh ïa ki.
Kane kadei hadien ka jingjia ba dang shen ha kaba ka Tnad ka Koit ka Khiah ka la leit bret da ki lak tylli ki dawai sha Marten.
Ka Kong Ampareen Lyngdoh ka la ïathuh ïa ki nongthoh khubor ba ka jingtohkit halor katei ka dang ïaid shakhmat. “Nga dang ap ban ïoh pdiang ïa ka kaiphod halor katei ka jingtohkit,” kala ong.
“Hynrei ngi la thung pat ïa ka committee ka ban khmih bniah ïa ki dawai dashin ki ban bret noh khnang ban pynthikna ba ka jingbret ïa ki dawai dashin kan long ha ka lynti kaba dei da ki tnad sorkar” ka la bynrap.
Kala ong ba ym ju don kano kano ka committee ne ka bor sorkar ka ban khmih ban pynthikna ïa ki dawai dashin ki bym long shuh.
“Kam ju don kano kano ka jingtehlakam ïa ka jingpynjaboh (Pollution Control) ban pynthikna ba kan don ka jingbud ryntih ïa ki kyndon bad nangne shakhmat ngin phah bud ryntih ïa ki kyndon jingbthah ha kaba ïadei bad ka jingbret ïa ki dawai dashin bala dier por bad kitei ka long kaba donkam bha bad kum ka sorkar ngi donkam ban buh noh da ki kyndon” ka la ong.
Ka Kong Ampareen ka la ong ba la bthah ïa ka committee ba ka dei ban bud ryntih ïa ki kyndon jingbthah.
Ka tnad ka Koit ka Khiah, Municipal Board, Pollution Control Board, Drugs Controller Authority bad kiwei kiwei kin dei ki dkhot ha katei ka commitee.
