Dang ap ki Myntri ïa u CM ban batai shwa ban buddien ïa ka ILP bad ktien Khasi bad Garo sha Delhi

Shillong, Naitung 18 : Ki Myntri Sorkar ki dang ap ïa u Myntri Rangbah ka Jylla Conrad K Sangma, ba un batai lem ïa ki halor ka jingtyrwa ban leit sha Delhi ha ka ban buddien bad ka Sorkar Pdeng ïa ki artylli ki Resolution jong ka ïing Dorbar Thaw Aiñ ka jylla, ban pyntreikam ïa ka Inner Line Permit (ILP) bad pynrung ïa ka ktien Khasi bad Garo ha ka Khyrnit ba phra ka Riti Synshar ka Ri.
“Ngin ap ïa u Myntri Rangbah ban batai ïa ngi bad ngi kwah ruh ban ïohi ba kine ki kam kin nym sahteng shuh bad kumjuh ruh ba ki paidbah kin ym pyrkhat ba ngi la pynpjah ïa kine ki kam” ong ka Myntri bad Nongaiktien ka Sorkar MDA Kong Ampareen Lyngdoh haba ïakren bad ki nongthoh khubor.
Haba kylli, ka Kong Ampareen ka la ong “Ka ILP ka dei ka kam kaba ngi la ïakren na ka por sha ka por. Ka MRSSA ruh ka dei kaba ngi la mynjur. Lah dep ban pynkylla ruh ïa ka bad la dep ban mynjur” haba bynrap “Ka ILP ka dei kaba kam kaba ka Sorkar India kan hap ban ai jingmynjur bad ka dei ma ka kaba don ka bor ban ai jingbit ban pyntreikam ïa ka ILP hapoh ka Jylla Meghalaya”.
Ka Kong Ampareen ka la ban jur ruh ba ki paidbah ki dei ban tip ïa ka jingshisha ba ki don katto katne ki kam namar ka jingïaid ka synshar khadar hapoh ka Ri kaba ngi ïadon lang, ngin hap ban ïaid kat kum ki katto katne ki jingdonkam bad ki rukom treikam.
Halor ka ktien ka thylliej, ka Myntri kala ong ba la pyntip ba ki don katto katne ki jingdonkam kiba ka Sorkar kan hap ban leh bad mynta ka Sorkar ka dang leh ïa kane.