Shillong, Naitung: Ka tnat shipai 50 Bn Border Security Force (BSF) Meghalaya ha ryngkat ka jingïatreilang bad ka Civil Hospital, Ampati, South West Garo Hills, ha ka 17 tarik mynta u bnai ka la pynlong ïa ka prokram ai snam mon sngewbha (Blood donation Camp) ha kaba ki la don haduh palat 45 ngut ki dkhot na ka tnat shipai BSF kiba la wan shakhamt ban ai snam da ka jingkut jingmut ban ïarap ban pyllait im ïa ki para mynsiem briew.
ïa kane ka prokram la wan plie da u Sh. Yuvraj Dubey,Comdt ka 50 Bn BSF ha ryngkat ka jingïa don lang u ShRandheer Singh Gill, Second-in-Command, ka Dr Heena Khan Ac/Mo 50 Bn bad ki Medical napoh ka civil Hospital Ampati.
Haba aijingkren ha ka prokram na ka liang u Dr. Denisha G Momin Medical Superintendent, Ampati civil Hospital u la pynpaw halor ka jingdokam ban wan shakhmat ban ai snam mon sngewbha, kata da kaba ong shi unit ka snam ba la noh synñiang da ki riew shimet ka lah ban pyllait im ïa kiba bun ki mynsiem briew.
Ha ka juh ka por u la pyrto ruh ïa ka sienjam ba la shim da ki dkhot jong ka tnat shipai BSF ban wan shakhmat ban ai snam mon sngewbha na ka bynta ban ïarap ban shakri ïa ka longbriew ka manbriew nalor ka kamram ban ïada ïa ki jaka khappud jong ka ri.
