Ym don jingpyrshah ban pynkut ïa ka tamasa Cherry Blossom ha ka Sngi U Blei
Pynpaw ka SRS Ri Bhoi ha u Myntri kam jngohkai
Shillong, Risaw 31 : Ka Synjuk ki Rangbah Shnong ka Ri-Bhoi, ki la pynshai ba kim don satia ïa kano kano ka jingpyrshah ne don ka jingsngew ban pyrshah ïa ka rai jong ka Sorkar ban pynkut ïa ka tamasa Cherry Blossom ha ka Sngi U Blei.
ïa katei la pynsngew da ki nongïalam jong ka Synjuk ha ka jingïalang bad u Myntri ka tnad Jngohkai u Bah Paul Lyngdoh kaba la long ha Conference Hall jong ka Secretariat.
U General Secretary ka Synjuk Bah PB Sylliang haba ïakren bad ki nongthoh khubor ha ka sngi Ba-ar, ula pyntip ba ka Synjuk kam don jingpyrshah satia ïa ka sngi ba la jied ban pynkut ïa ka tamasa Cherry Blossom.
Ula batai ruh ba wat ka Dorbar Shnong ka Lumdaitkhla ka la dep ai ïa ka jingbit na ka bynta kane ka tamasa.
Hynrei ula ong pat, ka Synjuk ka la shu ai jingmut ba ha ki snem ban wan, kan bha shibun ban nym pynlong shuh ïa kane ka tamasa ha ka Sngi U Blei khnang ban burom lang ïa ka jingsngew jong ki riew ngeit Khristan hapoh ka Jylla.
Wat hapdeng kane, ka Sorkar Jylla ka la dep rai ha ka ban bthah ïa ki nongpynïaid jong ka tamsa ba kin pynsdang noh ïa ka tamasa ha ka por janmiet hadien ba la wai lut ki Jingïaseng.
Ka tamasa Cherry Blossom 2023 ka dei kaba la buh ban pynlong ha ka 17-19 tarik Naiwieng ha Lumdaitkhla, Bhoirymbong, Ri-Bhoi District.
Hynrei ka rai ban pynkut ïa ka tamasa ha ka sngi U Blei ka la pynmih pynban ïa ki jingpyrshah na ki katto katne ki kynhun, kiba ïasaid ba ka Sngi U Blei ka dei ka sngi kyntang jong ki paid Khristan kiba don bun paid hapoh ka Jylla.