Shillong, Risaw 31: Ki Pulit jong ka East Khasi Hills ha ka Lah Sngi u Blei ki la kem ïa u President jong ka Hynñiewtrep National Youth Front (HNYF) East Khasi Hills District u Bah Bles Dkhar halor ka jingkynnoh ba u donkti ban dawa pisa na ki trok kit mar.
Ki Pulit ki la ïathuh ba ka jingkem ïa une u nongïalam ka HNYF, uba la mih khubor ha kine ki sngi baladep namar ki kam kiba bun ba u la leh kum u nongïalam jong ka Seng, kum ka jingkhynra ïa ki dukan thoh tim, ka jingpyrshah ïa ka jingpynduh ïa ka jaka Parking hajan Bimola bad kiwei kiwei.
Nalor kata, la jingpynshisha ruh ïa ka jingïakren jong u Bah Bless Dkhar bad uwei u briew halor ka khubor bad ka Audio Recording ba la saphriang ha ka rynsan jong ka Social Media, kiba pynshisha ïa ka jinglum pisa jong une u nongïalam ka HNYF na ki trok kit mar ba un ïarap ban pyllait ba kin ïaid na ka Jingkieng Damsite.
Ïa kane ka jingïakren u Bah Bles bad uwei u briew uba ym shym la pynithuh la pynmih lyngba ka Audio ha ka lad pathai khubor jong u Shillong Mail.
Ha ka sngi Baar, ki Pulit ki la tian bishar ïa u Bah Bless Dkhar ha Kashari jong u District and Session Judge ka East Khasi Hills District hadien ba la kem ïa u na ka shnong Pohkseh, Shillong bad ka Kashari ka la aibor lai sngi kynthih ïa ki Pulit ban set ha Police Custody na ka bynta ban pynlong ïa ki jingtohkit kiba bniah.
