Kynduh mawsiang ka Sorkar Pdeng ha Meghalaya ban ïoh jaka shna pynheh surok: Nitin Gadkari

Guwahati, Risaw, 31: U Myntri ka Sorkar Pdeng uba peit ïa ka tnat Road Transport and Highways u Nitin Gadkari ha ka sngi Baar u la pyntip ba ka Sorkar Pdeng ka la theh pisa kumba T.3 lak klur ha kine ki 10 snem ba la leit noh na ka bynta ban shna ïa ki surokbah National Highway hapoh ki jylla jong ka thaiñ Shatei Lammihngi.
U Gadkari, u la maham ba ki bor pynïaid ki la ïakynduh mawsiang ha kaba ïadei bad ka jingshim jaka ha ki katto katne ki jylla jong ka thaiñ Shatei Lammihngi kum ka Jylla Meghalaya bad Nagaland bad ki projek ki lah ban shu pynsangeh noh lada ym lah ban weng noh mardor ïa kine ki jingeh.
Haba kren ha ka jingïalang bad ki lad pathai khubor hadien ba la wai ka jingïalang pyrkhat kam halor ka jingpyntrei ïa ki surokbah National Highways ha Assam u Gadkari u la ong, “ki projek kiba shongdor T. 2,89,425 lak klur la theh sha ki Jylla ka thaiñ Shatei Lammihngi ha kine ki 10 snem. Kine ki long na ka bynta ki projek kiba dang wan, kiba dang pyntrei bad ki projek kiba ladep pyntrei.”
U la ong ba ka jingjrong jong ki surokbah National Highway ha kane ka thaiñ ka la nang ïar kumba 10,800 km ha u snem 2014 sha ka 15,740 km haduh mynta.
U Myntri u la pynbna ruh ban mang pisa T. 800 klur hapoh ki ar tylli ki skhim na ka bynta ka Jylla Assam.