Shillong, Risaw 31 : Ka KHADC hynne ka sngi Ba-ar ka la pynbna ba kin don haduh 40 kynhun ki riewshemphang ban wad bniah ïa ka Jaidbynriew Khasi bad ka riti dustur tynrai jong ka Jaidbynriew.
Haba kren bad ki lad pathai khubor, u Executive Member ka tnad Education ba dei ruh u Chairman ka Research and Development Committee jong ka Council, Bah Carnes Sohshang u la pynpaw ïa ka jingkmen ban ïohi ba kin don palat spah kynhun ki riewstad bad kdep ïa kdep ïa knriew kiba la mih shakhmat na bynta ban tyrwa ba ki long kiba kloi ban wad bniah ïa ka tynrai jong ka Jaidbynriew.
Tangba, u la ong pat ba na kitei ki kynhun la jied tang kumba 38 – 40 kynhun ban pyndep ïa katei ka jingwad bniah kaba la buh por ban pyndep hapoh saw bnai.
Haba bynrap lang, u dkhot jong ka komiti ba phra ngut, Dr. DRL Nonglait u la pyntip ba katei ka jingwad bniah kan sdang noh naduh ka sngi kaba bud ha kaba na ka liang ka Council kin ai ïa ka shithi aiti kam bad lada kito ki kynhun ki la mynjur yn pyllait noh ïa ka song kyrshan pisa ba 25persen na ka 1lak tyngka kaba la mang.
Shwa kane, u Dr. Nonglait u la pynkynmaw biang ba katei ka jingwad bniah kan long naduh ïa ki riti dustur, ki phang ba ïadei ba ka niam ka rukom, ka shongkha shongman, ka ktien ka thylliej, ki kur ki jait, ki rukom synshar ki Hima ki Elaka, ki hok ki riti, ka akor ka burom ba hikai ki longshwa, ki jingngeit, ki rukom bat khyndew, ka put ka tem, ki jingtei sahnam, ki mawbyna, ka jingshna da ka kti, ka bam ka dih, ka rukom sumar tynrai, kumjuh ruh shaphang ki riewkhraw ka Jaidbynriew kum ki Syiem Khasi, u Rev JJM Nichols Roy bad bun kiwei kiwei.
“Baroh kiba wad bniah ki dei ban bud katkum ka jingpynbeit kiba ïadei bad ka jylli wad bniah bad ka rukom pynbeit ïa ki jingshem ruh kidei ban long kiba biang bha na ka bynta ka jingmyntoi ïa ki nongpule. Hadien kane, ka KHADC kan sa pynshong nongrim bad wat ban pynlong aiñ ban saiñdur pat ïa ki polisi treikam jong ka Council,” u la bynrap biang.
Shuh shuh u ong ruh ba lyngba katei ka jingwad bniah, ka Council kan sa don noh la ka jongka jinglum jingtip da ki briew lajong khlem da donkam shuh ban shu shaniah ha ka kaiphod ki nongwei ban tip ïa la ka jong ka tynrai.
Shwa kane, u Bah Carnes u la ong ba kane ka sienjam kan long ka jingmyntoi kaba khraw ym tang ïa ka Council hynrei wat ïa kiba pule ïa ka.
La ïathuh ruh ba ki kynhun ki la dep jied ïa la ki jong ki jong ki phang na ka bynta ban wad bniah. U la ong ruh ba hadien kane, ka Council ka lah wat ban don noh la ka jong ka Research Centre ban pynïar ia ka jingtreikam jong ka Committee.
Na ka liang ka Committee ki la ïathuh ba la kyntu ia baroh ki nongwad bniah ba ki dei ban pynbïang ïa ki jingwad bniah jong ki ha ka ktien Khasi khnang ba kiba bun ki nongpule kin ïoh lut ban pule.
