Da ka MLA skhim aiti u Bah Adelbert ïa ka HEARSE VAN ba 13 lak tyngka tam sha ka Seng Khasi Kmie

Shillong, Naiwieng 02: U MLA ka 17 North Shillong Constituency u Bah Adelbert Nongrum ha ka sngi nyngkong u la aiti bad pynlait paidbah ïa ka kali kit metïap (HEARSE VAN) kaba u la aiti ruh ïa u Shabi ka kali sha u President ka Seng Khasi Kmie u Rangbah O. Pyngrope.
Kane ka kali kaba shongdor kumba T. 13, 77,89 lak u MLA u la pynïoh lyngba ka MLA skhim snem 2023-24 bad 2024-25 kaba ïaid ruh lyngba ka Chief Minister Special Development Fund (CMSDF).
Katkum ka jingïathuh u President, u Rangbah O Pyngrope bad u Rangbah P D Nongrum uba la pynïaid ïa ka jingïalang, la ong ba kane ka la dei ka jingangud kaba la slem bha bad kaba donkam bha naba ka Seng Khasi Kmie ka la mad jingeh haba don ba khlad ki para dkhot ban kit ïa ka krong metïap na ïing shaduh u Lum Jingthang ba kyntang jong ka Seng bad ki pynpaw jingsngewnguh ïa u MLA uba la ai syndon da kaba heh haba la pan da kaba rit bad nalor kiwei pat ki jingïarap ba u la aiti naduh mynshwa sha ka Seng Khasi Kmie.
Ïa ka prokram bad ïa ka Kali la suit la shor la kyrkhu kyrdoh da ki jingduwai ka nguh dem blei da u Rangbah Skor Jala Chairman Kynhun U Tymmen U San, Seng Khasi Kmie, la ïoh jingkren lyngkot na u Rangbah Rangpher Rynjah dkhot JPK, nangta na u Chairman ka Lum Jingthang Committee u Rangbah Wallamphang Roy, ka jingpynlait ïa ka kali da u MLA kum u kongsan bad kren ai khublei na u Rangbah Dipshon L Nongbri Vice President Seng Khasi Kmie nalor ka jingdonlang kiba bun ki dkhot ka Seng Khasi bad kiba shah khot sngewbha.
U MLA haba kren u la ong ba ka don ka por ban ïaroh bad kumjuh ruh ban kynthoh bad pynpaw ruh ba lada ka Sorkar hapoh ka jingïalam u Myntri Rangbah u Conrad K Sangma ka leh ïa kaba dei hap ban ïaroh hynrei lada ka leh pat ïa kaba bakla hap kynthoh beit.
U la ong ruh ba namar ba u ïeng bad bat barabor ïa la ka nongrim bun sien u sah marwei, hynrei un ym ïapeiñ ïa ka nongrim ba u ïeng naduh mynshwa haduh mynta.
U la ong ruh ba kum u MLA u long kum u kpa ka constituency hynrei ha ki kam u dang long Rangbah bad donkam bun ki jingïatreilang ha babun ki liang bad ong ba dei barabor ban pan ïa kiba donkam ym ïa kaba kwah bad dei ban ïaineh haduh bakut bad ym tang ban long kiba ïaishah haba donkam ban leh ne wad jingïarap.
Katba ki nongïalam ka Seng Khasi Kmie ki la ïathuh ruh ïa ka khana kaba la pynlong ïa ka seng ban wad ki lad jingïarap na ka bynta kane ka jingdonkam, naba ki la don bun ki jingjia kiba ki dkhot jong ka seng haba ki donkam ban kit metïap ki la hap ban leit wad kali bad don bun ruh ki khep ba ki kali kim ngiam ban thep ïa ka krong ba kane ka la wanrah ka jingeh kaba khraw bha ïa ka Seng ha ki bun bun snem ba la leit, kumta ki la leit mih sha u MLA bad da kaba kyrpad ruh ban shu pynïoh tang da kaba rit ruh.
“Hynrei haba ngi la poi sha ïing Bah Rit la ong pynban ïa ngi ba kane ka jingtyrwa jong ngi ka dang long kaba rit bad ka kali kaba ngi la pan ka dei kaba rit bad kam ïahap, kumta la ïakren pynbeit bad ngi la ïoh pynban da kane kaba heh kaba ngim poi pyrkhat, kumta ngi ai burom shibun eh ïa u MLA jong ngi ba u la shimkhia ïa kane ka jingtyrwa jong ngi, wat la ngi la ap la katto katne por hynrei da ka jingïaineh ngi la ïoh ïa kane ka kali mynta ka sngi bad kan long ka jingkyrkhu kaba khraw bha ïa ka Seng Khasi Kmie bad khamtam eh ïa baroh ki dkhot ka seng ba kin lah ban pyndonkam ïa kane ka kali mynta nangne shakhmat, kaei pat kaba donkam ka dei ba ngin hap ban sumar sukher bad pynneh bha ïa ka ba ngin dup lah ban pyndonkam kham slem ïa ka,” ong u Vice President ka Seng Khasi Kmie u Bah P D Nongrum.
Lah ban ong ba kane ka HEARSE VAN ka don ka jingïapher na ka Mortuary Van bad ka Ambulance.