Shillong, ïaïong, 26: U Muktiar ba pawkhmat jong ka Jylla u Bah VGK Kynta ha ka sngi Baar u la pynpaw ba um don jingmut satia ban ïakhun ïa ka elekshon MP sha ka Ingdorbar Thawaiñ Lok Sabha ka ban sa long ha u snem 2024.
Ha ka jingïakren bad ki lad pathai khubor, u Bah Kynta u la ong, “ka dei kaba shisha ha ki jingkynthoh ha ka Social Media kiba bun ki tynruh ïa nga ban ïaleh ïa ka elekshon MP nangne na Shillong Seat. Hynrei kam dei ka kam kaba suk namarba ngam dei u politishian.
“Ban ngan leh politik ruh ngam nang, ka pisa ka tyngka ban shu bret bad ban shu pynbam pisa ruh ngam nang. Kaba ngam da sngewtynnat eh ka long ban jop ïa ka elekshon phin hap ban shu pynbam pisa ïa ki paidbah. Kata ka dei kaei kaei kaba ngam sngew ïahap. Kane ka kam saiñpyrthei ka dei ka kam (trei) monsngewbha,” u la ong.
“Ki paidbah kim dei ban long kiba khwan myntoi. Lada ki kwah ïano ïano ban jied kum u MP lane MLA kim dei ban don ka jingdawa pisa,” la ong shuh shuh u Bah Kynta.
“Ha,oid, ka dei ka jingshisha ba ki paralok bad ki paidbah na ka por sha ka por ki la tynruh ïa nga ban ïakhun ïa ka elekshon MP. Haduh mynta hi kam pat don kano kano ka seng saiñpyrthei ka ban wan ïakren bad nga ban long u kyrtong ha ka elekshon sha Lok Sabha,” u la ong.
Haba kylli, u Bah Kynta u la ong, “lada ka wan ka jingtyrwa (na ki seng saiñpyrthei) ngan da hap ban puson shihajar sien namarba nga don ha ka kam kaba ïadei bad ka aiñ kaba la nga la trei mynta la 34-35 snem.”
“Kam long kaba suk ban ong, ‘haoid’ ngan ïakhun,” la ong u Bah Kynta bad bynrap, “nga hap ban sngewthuh ruh ïa ka jingmut jingpyrkhat jong ki briew. Ngam da don eh ka jingkwah namarba ngam kwah ban kamai spah.”
“Ha nga shimet ngam da don mon eh. Hynrei lada ka don shisha ka jingkhot ngan hap ban pdiang ïa kum kata ka jingkhot. Hynrei ban shu kubur hi dalade ngam lah ban lah ban ong haoid.”
