Shillong Iaiong 26: Ka Khun Hynniewtrep National Awakening Movement (KHNAM) ha ka Sngi u Blei, ka la pynpaw ba lada ka sorkar jylla kala rai ban pyntreikam iaka Roster Synstem naduh ki snem kiba la leit ne ‘Retrospectively’, ka hap ban pynthikna ba ka roster registers bad ka roster accounts ka dei ïa ka ban pynkhreh thik pa thik bad katkum ki kyndon jong ka Ain.
Ka KHNAM kala phah ïa ka dorkhas halor katei sha u Myntri Rangbah ka jylla u Conrad K Sangma ba un tuklar bad la phah kopi ruh sha ki seng saiñ pyrthei kiba kynthup ïaka NPP, UDP, VPP, HSPDP, PDF, BJP, AITC bad Congress.
U Vice President ka KHNAM u Bah Thomas Passah ula ong ka sorkar kan donkam ruh ban pynlong mamla ruh ïaka MPSC bad kiwei kiwei ha ka jingpynkhreh ïaka roster register da kaba bthah ba kin pynmih biang ïaka result thungkam naduh u snem 1972-2022 bad ban phiah ruh ïa ki kyrtong ba shah jied.
Ula ong, da kaba bud ïa katei, ki tnad sorkar ki dei ban pynkhreh ïaka roster registers & roster accounts kaba dei da kaba rekod ïa ki jingtip kiba la pynbiang da ka MPSC ne kino kino ki bor thungkam jong ka sorkar.
“Ban kiar ïa ka jingpynheh ïa ki kam kiba lait ki bym pat thung briew, dei ban pynthikna ba ki jingtip bad ki jingai jingkheiñ ha kaba ïadei bad ka jingthungkam ïa kiwei pat lyngba ka 15% Unreserved Category ym dei ban pynrung lang haka Reserved Category jong ki Khasi-Jaintia/Garo bad kiwei pat ki riewlum”.
Ula ong, lada ka sorkar kam lah ban pynbiang ïa kitei baroh kumta kadei ban pynsangeh ïaka jingpyntreikam ïaka Roster System naduh ki snem kiba mynshwa hynrei ban sdang pyntreikam noh nangne shakhmat kata naduh u snem 2023 shaneng.
“Ki sienjam kiba la shim ha ka jingpynkhreh ïa ka roster registers & roster accounts ka long kaba don jingdkoh bad jingbakla namar ym shim la ñiew ïa ka jingshisha ba la bun snem mynta, kiba bun ki samla kiba la ïohkam lyngba ka Unreserved/Open Category ki dei na ka jaidbynriew Khasi-Jaintia, hynrei ka rukom pynkhreh ïa katei ka kam, la kheiñ ba baroh ki nongtrei Khasi bad Jaintia kila shah thungkam lyngba ka 40% reserved quota bad ym shym la don satia ki nongtrei Khasi-Jaintia kiba la shah thungkam lyngba ka UR/Open category” ong u Bah Passah bad kane kala pyni kumba ki Khasi bad Jaintia kila ïoh bun naka bhah kaba la mang ia ki.
U Bah Passah ula ong dei ban pynkhreh ïa ka roster registers & roster accounts kaba paka bha khnang ban lah ban pyni shai kdar ïaka jingdon ki kam kiba lait bad ban lah ban bhah lang sha baroh ki nongaplai kam, ïa kaba ym shym la leh ne pyndonkam da ki tnad sorkar, lehse namar ka jingbym don ïa ki jingtip ne ki jingkheiñ kiba thikna haka jingpynmih ïa ka result da ka MPSC bad kiwei kiwei naduh u snem 1972 haduh u 2022.
