Duh thiah ki nongïalam ba wan kyrshut ki party ba kwah treilang bad NPP ha ka sorkar

Shillong, Ïaiong 26 : Mar ïa dep pynbna ïa ka result elekshon MLA ha u Lber mynta u snem, baroh ki party ki wan ban khroh ïa ki nongïalam ka NPP ban ïoh jaka lang ha ka sorkar, ong u Bah Prestone Tynsong haba kren ha ka jingïalang ïalap elekshon na bynta u kyrtong ka NPP, Bah Samlin Malngiang ha Madanbitaw, Sohiong ha kane ka sngi Balang.
Nalorkata, u Bah Prestone uba dei ruh u National Vice President ka NPP bad ruh u Symbud Rangbah ka jylla u la ong ba mar ïa dep niew vote ka mat kaba khluit ba ki iakren kadei ban ïoh thaw sorkar. “Ngi don 26ngut ki MLA bad ngi duna tang san ngut namar ngi donkam 31 ngut. Hynrei uwei na kadiang u wan tyrwa, na kamon ruh wan tyrwa kumjuh bad na khmat bad nadien ki wan tyrwa haduh manga bad u Conrad ngi khlem ïoh thiah shuh.”
U ong ruh ba dei lyngba ka jingkwah treilang jong baroh ki party mynta ki la don haduh 45 ngut ki MLA ha ka Liang Synshar. “Ha ka jingshisha nga kwah ba ngin don tang hapoh 40 ngut kan kham bha hynrei khatduh ngi don mynta 45 ngut. Na kita ki 45 ngut ki sdsang ban wan lynthem maw hangne ha Sohiong. Nga ruh nga la ïohi ha social media kumno ki ïakren ba kane ka jingkren jong ki ka pynpaw shai kdar ba ka nongrim jong ki kam don shuh,” u la bynrap shuh shuh.
Shuh shuh u ong ruh ba um artatien shuh ba ki paidbah nongthep vote ka Sohiong ba kin shah ïalam bakla. “Ka result ngi la dep ïoh lypa. Ko nong Sohiong lada phi pynrem ïa u Bah Samlin ruh phim lah ban weng ïa ka sorkar NPP nga kren lypa ïa kata. Bad lada phi pynrem ïa une u rangbah ruh kamut phi isih ïa kane ka pateng san snem kaban wan.”
Kumban shu kdew hangne ki don haduh hynriew ngut ki kyrtong kiban aireng ha kane ka elekshon kaban sa long ha ka 10tarik u Jymmang. Nalor u Bah Samlin kyrtong ka NPP, kiwei ki party kiba sei kyrtong ki kynthup naduh ka UDP, Congress, TMC, BJP bad ka HSPDP.