Shillong, ïaïong, 26: Ka Universal Sompo General Insurance Company (USGIC) Ltd, kum shi bynta ban noh synniang sha u sup u thiar jong ka koit ka khiah, ka la aiti da ki tiar jingsumar kiba kynthup lai tylli ki Haemodialysis Machine, ar tylli ki Cardiac Monitor Machine, kawei ka Ultrasound Machine bad ar tylli ki Dialysis Couches sha ka Civil Hospital, Shillong.
Ka Shillong Civil Hospital ka dei ka shlem ai jingsumar kaba la don bun jait ki tnat ban sumar ïa ki nongpang kiba kynthup ïa ka Medicines, Surgery, Orthopaedics, E.N.T., Ophthalmology, Cardiology, Dentistry, Psychiatrist and Radiology bad kiwei kiwei. Da ka jingdon jong kine ki tnat ai jingsumar ka la long ka jingmyntoi haduh katta katta ïa ki paidbah nongshong shnong jong ka sor bad khap sor.
U MD & CEO jong ka Universal Sompo u Sharad Mathur haba kren ha kane ka sngi, u la ong, “ban ïoh ïa ki tiar ai jingsumar kiba paka ka dei kawei na ki jingdonkam ba kongsan tam ha ka ri. Da ka jingnoh synñiang ïa ki tiar ai jingsumar sha ka Shillong Civil Hospital ngi don ka jingthmu ban pynkupbor shuh shuh ïa ki paidbah ha ka liang ka koit ka khiah kaba paka. Ngi kyrmen ba ki paidbah kin ïoh jingmyntoi na kine ki tiar ai jingsumar khnang ba kin ïoh ïa ka jingkoit jingkhiah bapura. Ka haemodialysis machine bad ka dialysis couches ki dei kiba ngi la noh synñiang kyrpang na ka bynta ki nongpang khyllai katba ïa ka cardiac monitor machines la ai kyrpang na ka bynta ban sumar ïa kiba pang klongsnam, bad ïa ka ultrasound machine la ai khang ban lap kham kloi ïa ki jait jingpang.”
“Da kaba wanrah ïa kine ki tiar ai jingsumar sha ka jaka ba kham kyndong tam jong ka ri, ngi kwah ban pun jingkieng ïa ka jaka bathylli khnang ba ki paidbah ka sor Shillong bad ki jylla ba marjan kim donkam shuh ban leit wad jingsumar sha ki jaka sumar kiba jngai. Ngi kyrmen ba ngin nang ïai bteng ban ai jingkyrshan ha ka liang ka koit ka khiah khnang ban pynlong ïa ka ri kaba khlaiñ,” la bynrap u Mathur.
